پاکستان کے نائب وزیراعظم اور وزیر خارجہ سینیٹر محمد اسحاق ڈار شنگھائی تعاون تنظیم (SCO) کے وزرائے خارجہ کونسل اجلاس میں شرکت کے لیے کرغزستان کے شہر چولپون آتا پہنچ گئے، جہاں ان کا اعلیٰ حکام نے پرتپاک استقبال کیا۔
دفتر خارجہ کے مطابق کرغزستان پہنچنے پر نائب وزیر خارجہ کیرات ترسنکولوف، کرغزستان میں پاکستان کے سفیر التمش وزیر، شنگھائی تعاون تنظیم کے لیے پاکستان کے قومی رابطہ کار ڈاکٹر محمد فیصل اور وزارت خارجہ کے سینئر حکام نے اسحاق ڈار کا استقبال کیا۔
بیان کے مطابق نائب وزیراعظم جمعرات کی شام شنگھائی تعاون تنظیم کے وزرائے خارجہ کے غیر رسمی عشائیے میں شرکت کریں گے، جہاں رکن ممالک کے وزرائے خارجہ آئندہ اجلاس کے ایجنڈے اور باہمی دلچسپی کے امور پر ابتدائی تبادلہ خیال کریں گے۔
دفتر خارجہ نے بتایا کہ شنگھائی تعاون تنظیم کے وزرائے خارجہ کونسل کے اجلاس میں پاکستان، چین، بھارت، ایران، روس، بیلاروس، قازقستان، کرغزستان، تاجکستان اور ازبکستان سمیت تمام رکن ممالک کے وزرائے خارجہ شریک ہوں گے۔
شنگھائی تعاون تنظیم کا وزرائے خارجہ کونسل اجلاس تنظیم کا تیسرا اعلیٰ ترین فورم تصور کیا جاتا ہے، جہاں رکن ممالک بین الاقوامی امور، علاقائی سلامتی، خارجہ پالیسی، تعاون اور تنظیم کے مستقبل کے لائحہ عمل پر غور کرتے ہیں۔
دورے کے دوران نائب وزیراعظم اسحاق ڈار کرغزستان کے صدر سے بھی ملاقات کریں گے، جبکہ اجلاس کے موقع پر شنگھائی تعاون تنظیم کے رکن ممالک کے اپنے ہم منصبوں سے متعدد اہم دوطرفہ ملاقاتیں بھی کریں گے۔ ان ملاقاتوں میں دوطرفہ تعلقات، علاقائی امن، اقتصادی تعاون اور باہمی دلچسپی کے دیگر امور پر تبادلہ خیال متوقع ہے۔
