پاکستان اور پولینڈ کا موسمیاتی تبدیلی اور آفات سے نمٹنے کے لیے تعاون بڑھانے پر اتفاق

اسلام آباد: پاکستان اور پولینڈ نے موسمیاتی تبدیلی، قدرتی آفات سے نمٹنے، ادارہ جاتی روابط، مشترکہ تعاون اور استعدادِ کار میں اضافے کے لیے باہمی شراکت داری کو مزید مضبوط بنانے کے عزم کا اعادہ کیا ہے۔

نیشنل ڈیزاسٹر مینجمنٹ اتھارٹی (این ڈی ایم اے) کے مطابق پولینڈ کی وزارتِ داخلہ کے بین الاقوامی نمائندہ پاویل ڈبروسکی کی قیادت میں ایک اعلیٰ سطحی وفد نے این ڈی ایم اے ہیڈکوارٹرز میں قائم نیشنل ایمرجنسی آپریشنز سینٹر (NEOC) کا دورہ کیا۔

اس موقع پر چیئرمین این ڈی ایم اے لیفٹیننٹ جنرل انعام حیدر ملک نے وفد کا خیرمقدم کرتے ہوئے انہیں این ای او سی کے دائرۂ کار، پاکستان کے جدید ڈیزاسٹر مینجمنٹ نظام اور قدرتی آفات سے نمٹنے کے قومی لائحہ عمل پر تفصیلی بریفنگ دی۔

وفد کو این ڈی ایم اے کی جدید ٹیکنالوجی، ڈیزاسٹر ارلی وارننگ سسٹم، قومی سطح پر مربوط ہنگامی ردعمل، خطرات کی پیشگی نشاندہی، حفاظتی اقدامات، وسائل کی بروقت فراہمی اور بین الاقوامی امدادی رابطہ کاری کے مؤثر نظام سے بھی آگاہ کیا گیا۔

این ڈی ایم اے نے وفد کو پاکستان اور خطے کو 2026 کے دوران درپیش ممکنہ قدرتی خطرات اور ان سے نمٹنے کے لیے اختیار کی گئی حکمت عملی پر بھی بریفنگ دی۔

پولینڈ کے وفد نے این ڈی ایم اے کے جدید، مؤثر اور عالمی معیار کے ڈیزاسٹر مینجمنٹ نظام کو سراہتے ہوئے پاکستان کے ساتھ اس شعبے میں تعاون کو مزید فروغ دینے کی خواہش کا اظہار کیا۔

ملاقات کے اختتام پر دونوں ممالک نے موسمیاتی تبدیلی کے چیلنجز، آفات سے نمٹنے، ادارہ جاتی روابط، مشترکہ منصوبوں اور استعدادِ کار میں اضافے کے لیے تعاون کو مزید مضبوط بنانے کے عزم کا اعادہ کیا۔