اسلام آباد: کینیڈا کی وزیر خارجہ انیتا آنند نے وزارتِ داخلہ میں وفاقی وزیر داخلہ محسن نقوی سے ملاقات کی، جس میں پاکستان اور کینیڈا کے درمیان دوطرفہ تعلقات، تجارت، سکیورٹی تعاون، غیرقانونی امیگریشن، انسانی اسمگلنگ اور سائبر کرائمز کی روک تھام سمیت اہم امور پر تفصیلی تبادلہ خیال کیا گیا۔
ملاقات کے دوران دونوں رہنماؤں نے قانون نافذ کرنے والے اداروں کے افسران کی تربیت، ایکسچینج پروگرامز اور باہمی تعاون کو مزید مؤثر بنانے پر بھی گفتگو کی۔ اس موقع پر دوطرفہ تعاون کو فروغ دینے کے لیے مفاہمتی یادداشت (ایم او یو) پر جلد دستخط کرنے پر اتفاق کیا گیا۔
وفاقی وزیر داخلہ محسن نقوی نے کہا کہ پاکستان کینیڈا کے ساتھ تمام شعبوں میں تعلقات کو مزید مضبوط بنانے کا خواہاں ہے۔ انہوں نے کہا کہ کینیڈا میں مقیم پاکستانی کمیونٹی دونوں ممالک کے درمیان تعلقات کے فروغ اور ترقی میں اہم کردار ادا کر رہی ہے۔
وزیر مملکت برائے داخلہ طلال چودھری نے کہا کہ مشترکہ مفادات کے شعبوں میں تعاون بڑھانے سے دونوں ممالک کے درمیان تعلقات مزید مستحکم ہوں گے اور نئے مواقع پیدا ہوں گے۔
کینیڈا کی وزیر خارجہ انیتا آنند نے اس موقع پر کہا کہ ان کا ملک پاکستان کے ساتھ تعلقات کو انتہائی اہمیت دیتا ہے اور دوطرفہ تعاون کو مزید وسعت دینے کا خواہاں ہے۔ انہوں نے زور دیا کہ مختلف شعبوں میں تعاون کے فروغ کے لیے ایک جامع فریم ورک مرتب کیا جانا چاہیے۔
ملاقات میں وزیر مملکت برائے داخلہ طلال چودھری، پاکستان میں کینیڈا کے ہائی کمشنر، ڈی جی ایف آئی اے، وزارت داخلہ کے ایڈیشنل سیکریٹریز اور دیگر اعلیٰ حکام بھی شریک تھے۔
