وزیراعلی پنجاب مریم نوازشریف وفد کے ہمراہ باکو پہنچ گئیں جہاں باکو ائیرپورٹ پر ان کا پرتپاک استقبال کیا گیا۔
وزیراعلیٰ مریم نواز شریف اور پنجاب کے وفد کا استقبال آذربائیجان کے ڈپٹی منسٹر برائے دفاعی صنعت مسٹر مہمان بوکسی سوف نے کیا۔
اس موقع پر آذربائیجانی سفیرخضر فرہادوف اوران کی اہلیہ،آذربائیجان میں پاکستانی سفیر قاسم محی الدین اور ان کی اہلیہ بھی ائیرپورٹ پر موجود تھے۔
وزیراعلیٰ پنجاب تین روزہ دورے کے دوران حکومتِ آذربائیجان کی سرکاری مہمان ہوں گی۔ دورے کے دوران ان کی آذربائیجان کے صدر ائیلہام علیوف سے ملاقات بھی متوقع ہے۔
مریم نواز شریف 17 مئی کو باکو میں منعقد ہونے والے عالمی اربن فورم میں پاکستان کی نمائندگی کریں گی اور باکو اولمپک اسٹیڈیم میں ورلڈ لیڈرز سمٹ سے خطاب کریں گی۔
وزیراعلیٰ پنجاب فورم کے دوران پنجاب حکومت کے فلاحی ہاؤسنگ منصوبے “اپنی چھت، اپنا گھر” کو بھی عالمی سطح پر پیش کریں گی، جسے افورڈ ایبل ہاؤسنگ کے منفرد ماڈل کے طور پر متعارف کرایا جائے گا۔
وفد میں سینئر منسٹر مریم اورنگ زیب،وزیر اطلاعات عظمی بخاری،وزیر ہاؤسنگ بلال یسین،وزیر کھیل فیصل ایوب، وزیر زراعت عاشق حسین کرمانی،معاون خصوصی علی ڈار بھی شامل ہیں۔
