دمشق: شامی حکومت نے اعلان کیا ہے کہ فرانس کے صدر ایمانوئل میکرون آئندہ دنوں میں شام کا سرکاری دورہ کریں گے، جہاں وہ شامی صدر احمد الشرع سے دوطرفہ تعلقات، اقتصادی تعاون اور باہمی دلچسپی کے اہم علاقائی و بین الاقوامی امور پر تفصیلی مذاکرات کریں گے۔
شام کے صدارتی میڈیا ڈائریکٹوریٹ کی جانب سے سرکاری خبر رساں ادارے سانا کے ذریعے جاری بیان میں بتایا گیا ہے کہ فرانسیسی صدر کے ہمراہ سرمایہ کاروں کا ایک اعلیٰ سطحی وفد اور مختلف فرانسیسی کمپنیوں کے نمائندے بھی شام آئیں گے، جو دونوں ممالک کے درمیان اقتصادی اور تجارتی تعاون کے امکانات کا جائزہ لیں گے۔
بیان کے مطابق دورے کے دوران صدر احمد الشرع اور صدر ایمانوئل میکرون اپنے اپنے سرکاری وفود کے ہمراہ ایک مشترکہ گول میز اجلاس میں شرکت کریں گے، جس میں سیاسی، اقتصادی، تجارتی اور ترقیاتی شعبوں میں تعاون کو فروغ دینے سمیت مختلف اہم معاملات پر تبادلہ خیال کیا جائے گا۔
تاہم شامی حکام نے فرانسیسی صدر کے مجوزہ دورے کی حتمی تاریخ کا اعلان نہیں کیا۔
سیاسی مبصرین کے مطابق اگر یہ دورہ طے شدہ منصوبے کے مطابق ہوتا ہے تو 2024 کے آخر میں بشار الاسد حکومت کے خاتمے کے بعد کسی فرانسیسی صدر کا یہ شام کا پہلا سرکاری دورہ ہوگا، جسے شام اور یورپی ممالک کے تعلقات میں ایک اہم پیش رفت قرار دیا جا رہا ہے۔
ماہرین کا کہنا ہے کہ یہ دورہ شام کی تعمیرِ نو، غیر ملکی سرمایہ کاری اور یورپی ممالک کے ساتھ سفارتی روابط کی بحالی کے حوالے سے بھی اہم ثابت ہو سکتا ہے۔
