تہران: ایران نے دعویٰ کیا ہے کہ جنوبی ایران میں امریکی فضائی حملوں کے نتیجے میں ایرانی مسلح افواج کے 8 اہلکار شہید ہوگئے ہیں۔
ایرانی سرکاری خبر رساں ادارے ارنا کے مطابق ایرانی فوج نے تصدیق کی ہے کہ بدھ کی صبح بندر عباس اور بوشہر میں فوجی تنصیبات پر ہونے والے امریکی حملوں کے دوران فضائیہ اور بحریہ سے تعلق رکھنے والے 8 اہلکار جان کی بازی ہار گئے۔
ایرانی فوج کے جاری کردہ بیان میں کہا گیا ہے کہ شہید اہلکار امریکی میزائل حملوں کے دوران ملکی دفاع کی ذمہ داریاں انجام دے رہے تھے اور حملوں کی زد میں آکر شہید ہوئے۔
بیان میں امریکی کارروائی کو "مجرمانہ جارحیت” قرار دیتے ہوئے کہا گیا کہ ایرانی مسلح افواج ملکی دفاع کے لیے اپنی ذمہ داریاں پوری کرتی رہیں گی۔
ایرانی فوج نے اس عزم کا بھی اظہار کیا کہ شہید اہلکاروں کی قربانی کو رائیگاں نہیں جانے دیا جائے گا اور ان کے خون کا بدلہ لیا جائے گا۔
امریکی حکام کی جانب سے تاحال اس ایرانی دعوے پر کوئی باضابطہ ردعمل سامنے نہیں آیا، جبکہ خطے میں بڑھتی ہوئی کشیدگی کے باعث عالمی برادری صورتحال پر گہری نظر رکھے ہوئے ہے۔
