دوحہ / بیجنگ: ایران اور امریکا کے درمیان دوبارہ بڑھتی ہوئی کشیدگی کے تناظر میں قطر اور چین نے گہری تشویش کا اظہار کرتے ہوئے تمام متعلقہ فریقوں پر زور دیا ہے کہ وہ تحمل کا مظاہرہ کریں، مزید فوجی تصادم سے گریز کریں اور سفارتی مذاکرات کا سلسلہ جاری رکھیں۔
خبر رساں اداروں کے مطابق قطر نے ایران کی جانب سے کویت اور بحرین پر کیے گئے حملوں کی مذمت کرتے ہوئے کہا ہے کہ ایسے اقدامات خطے کے امن، استحکام اور سلامتی کے لیے نقصان دہ ثابت ہو سکتے ہیں۔
قطری وزارت خارجہ نے اپنے بیان میں کہا کہ خطے کو مزید کشیدگی اور اس کے ممکنہ خطرناک نتائج سے محفوظ رکھنا ضروری ہے۔ وزارت نے تمام فریقوں پر زور دیا کہ وہ سفارت کاری اور مذاکرات کو ترجیح دیں اور ایران اور امریکا کے درمیان طے پانے والی مفاہمتی یادداشت کے تحت ہونے والی پیش رفت کو آگے بڑھائیں۔
دوسری جانب چین نے بھی امریکا کی جانب سے ایران میں مختلف اہداف پر کیے گئے حالیہ حملوں کے بعد مشرق وسطیٰ کی بگڑتی ہوئی صورتحال پر تشویش ظاہر کی ہے۔
چینی وزارت خارجہ کی ترجمان ماؤ نِنگ نے بیجنگ میں میڈیا بریفنگ کے دوران کہا کہ مشرق وسطیٰ میں جنگ یا کشیدگی کا دوبارہ بھڑک اٹھنا کسی بھی فریق کے مفاد میں نہیں۔
انہوں نے کہا کہ فوجی کارروائیاں بنیادی مسائل کا مستقل حل فراہم نہیں کرتیں، اس لیے تمام متعلقہ ممالک کو اختلافات کے حل کے لیے مذاکرات اور سفارتی ذرائع اختیار کرنے چاہئیں۔
چینی حکومت نے ایران اور امریکا دونوں پر زور دیا کہ وہ تحمل کا مظاہرہ کریں، مزید کشیدگی سے گریز کریں اور مسائل کے حل کے لیے بات چیت کا راستہ اپنائیں تاکہ خطے میں امن و استحکام برقرار رکھا جا سکے۔
