اسلام آباد: گورڈن گرلیچ راڈمان، جو کروشیا کے وزیرِ خارجہ و یورپی امور ہیں، نائب وزیراعظم و وزیر خارجہ اسحاق ڈار کی دعوت پر 9 جولائی 2026 کو پاکستان کا سرکاری دورہ کریں گے۔
وزارت خارجہ کی جانب سے جاری بیان کے مطابق یہ کسی بھی کروشین وزیرِ خارجہ کا پاکستان کا پہلا سرکاری دورہ ہوگا، جسے دونوں ممالک کے تعلقات میں ایک اہم پیش رفت قرار دیا جا رہا ہے۔
دورے کے دوران نائب وزیراعظم و وزیر خارجہ اسحاق ڈار اور کروشین وزیر خارجہ کے درمیان وفود کی سطح پر تفصیلی مذاکرات ہوں گے، جن میں پاکستان اور کروشیا کے درمیان دوطرفہ تعلقات کے تمام اہم پہلوؤں کا جائزہ لیا جائے گا۔
فریقین تجارت، سرمایہ کاری، ویزا سہولت، تعلیم، دفاع، انفارمیشن ٹیکنالوجی (آئی ٹی)، بحری تعاون اور دیگر باہمی دلچسپی کے شعبوں میں تعاون کو مزید وسعت دینے کے امکانات پر تبادلہ خیال کریں گے۔
بیان کے مطابق دونوں وزرائے خارجہ علاقائی اور عالمی صورتحال سمیت اہم بین الاقوامی امور پر بھی اپنے خیالات کا تبادلہ کریں گے۔
سرکاری دورے کے دوران کروشیا کے وزیر خارجہ وزیراعظم شہباز شریف اور چیئرمین سینیٹ یوسف رضا گیلانی سمیت پاکستان کی اعلیٰ سیاسی قیادت سے بھی ملاقاتیں کریں گے۔
وزارت خارجہ کا کہنا ہے کہ یہ اعلیٰ سطحی دورہ پاکستان اور کروشیا کے درمیان سفارتی تعلقات کو مزید مضبوط بنانے اور مختلف شعبوں میں باہمی تعاون کو فروغ دینے کے لیے اہم سنگ میل ثابت ہوگا۔
