پولینڈ کے مغربی وسطی علاقے میں واقع بیالوسلیوی (Białosliwie) گاؤں کے قریب دو مسافر ٹرینیں آپس میں ٹکرا گئیں، جس کے نتیجے میں کم از کم دو افراد زخمی ہو گئے جبکہ دونوں ٹرینوں میں تقریباً 200 مسافر سوار تھے۔
غیر ملکی خبر رساں ادارے رائٹرز کے مطابق حادثہ مقامی وقت کے مطابق شام تقریباً 6 بج کر 4 منٹ پر پیش آیا۔ پولینڈ کی فائر بریگیڈ کے ترجمان پاویل رائکوسکی نے بتایا کہ کولوبژیگ (Kołobrzeg) سے وارسا ایسٹ ریلوے اسٹیشن جانے والی مسافر ٹرین اور پیوا (Piła) سے بائیڈگوشچ (Bydgoszcz) جانے والی دوسری ٹرین بیالوسلیوی کے قریب ایک دوسرے سے ٹکرا گئیں۔
سرکاری حکام کے مطابق ابتدائی اطلاعات میں دو افراد کے زخمی ہونے کی تصدیق کی گئی ہے، تاہم زخمیوں کی حالت اور حادثے کی مکمل نوعیت کے بارے میں مزید تفصیلات سامنے نہیں آئیں۔
مقامی نشریاتی ادارے TVP Poznań کے مطابق ریسکیو ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کر دیں۔
سوشل میڈیا پر گردش کرنے والی ویڈیوز میں مسافروں کو ٹرینوں سے باہر نکلتے اور ریلوے ٹریک کے اطراف جمع ہوتے دیکھا جا سکتا ہے، جبکہ امدادی اہلکار متاثرہ افراد کو محفوظ مقامات پر منتقل کرتے ہوئے دکھائی دے رہے ہیں۔
پولش حکام نے حادثے کی وجوہات جاننے کے لیے تحقیقات کا آغاز کر دیا ہے، جبکہ ریلوے ٹریفک کی بحالی کے لیے بھی اقدامات جاری ہیں۔
