مظفرآباد: آزاد جموں و کشمیر کے عام انتخابات 2026 کے لیے الیکشن کمیشن نے امیدواروں کی نظرثانی شدہ اور حتمی فہرست جاری کر دی ہے۔ کاغذات نامزدگی واپس لینے کی آخری تاریخ گزرنے کے بعد مجموعی طور پر 852 امیدوار مختلف انتخابی حلقوں میں اپنی قسمت آزمائیں گے۔
الیکشن کمیشن کے مطابق انتخابات کے لیے مجموعی طور پر 1,255 امیدواروں نے کاغذات نامزدگی جمع کرائے تھے، تاہم جانچ پڑتال اور دستبرداری کے مرحلے کے بعد 313 امیدوار انتخابی عمل سے الگ ہو گئے۔ اس کے بعد 45 انتخابی حلقوں کے لیے امیدواروں کی حتمی فہرست جاری کر دی گئی ہے۔
الیکشن کمیشن کی جانب سے جاری اعداد و شمار کے مطابق مختلف ڈویژنوں میں امیدواروں کی تعداد میں نمایاں فرق دیکھنے میں آیا ہے۔
مظفرآباد ڈویژن کے چار حلقوں میں 129 امیدواروں نے کاغذات نامزدگی جمع کرائے، جن میں سے 31 امیدوار دستبردار ہوئے، جبکہ اب 98 امیدوار انتخابی میدان میں موجود ہیں۔
میرپور ڈویژن کے تین حلقوں میں 83 امیدواروں نے کاغذات نامزدگی جمع کرائے تھے۔ 20 امیدواروں کی دستبرداری کے بعد اب 63 امیدوار مقابلہ کریں گے۔
کوٹلی ڈویژن کے چھ حلقوں میں 197 امیدواروں نے کاغذات جمع کرائے، جن میں سے 62 امیدوار دستبردار ہوئے، جبکہ 135 امیدوار حتمی فہرست کا حصہ ہیں۔
باغ ڈویژن کے چار حلقوں میں 115 امیدواروں نے کاغذات نامزدگی جمع کرائے، 32 امیدواروں نے انتخابی دوڑ سے الگ ہونے کا فیصلہ کیا، جس کے بعد 83 امیدوار باقی رہ گئے۔
پونچھ ڈویژن کے سات حلقوں میں 179 امیدوار میدان میں آئے تھے، تاہم 53 امیدواروں نے دستبرداری اختیار کی، جس کے بعد 126 امیدوار انتخاب میں حصہ لیں گے۔
نیلم کے دو حلقوں میں 74 امیدواروں نے کاغذات نامزدگی جمع کرائے تھے، جن میں سے 20 امیدوار دستبردار ہوئے اور اب 54 امیدوار میدان میں موجود ہیں۔
مظفرآباد کے پانچ حلقوں میں 217 امیدواروں نے کاغذات نامزدگی جمع کرائے، 66 امیدوار دستبردار ہوئے جبکہ 151 امیدوار حتمی فہرست میں شامل ہیں۔
جہلم ویلی کے دو حلقوں میں 53 امیدواروں نے کاغذات نامزدگی جمع کرائے تھے، جن میں سے 21 امیدوار دستبردار ہوئے، جس کے بعد 32 امیدوار انتخاب لڑیں گے۔
حویلی کے چھ حلقوں میں 111 امیدواروں نے کاغذات جمع کرائے، 29 امیدواروں نے دستبرداری اختیار کی جبکہ 82 امیدوار میدان میں موجود ہیں۔
اسی طرح وادی لیپا کے چھ حلقوں میں 97 امیدواروں نے کاغذات نامزدگی جمع کرائے، جن میں سے 43 امیدوار دستبردار ہو گئے، جبکہ 54 امیدوار اب انتخابی مقابلے کا حصہ ہیں۔
الیکشن کمیشن کی جانب سے امیدواروں کی حتمی فہرست جاری ہونے کے بعد آزاد کشمیر بھر میں انتخابی سرگرمیوں میں مزید تیزی آ گئی ہے۔ مختلف سیاسی جماعتوں اور آزاد امیدواروں نے اپنی انتخابی مہم کو حتمی مرحلے میں داخل کرتے ہوئے عوامی رابطوں میں اضافہ کر دیا ہے۔
سیاسی مبصرین کے مطابق متعدد حلقوں میں سخت اور دلچسپ مقابلوں کی توقع کی جا رہی ہے، جہاں مختلف جماعتوں کے امیدوار ایک دوسرے کو ٹف ٹائم دینے کے لیے بھرپور انتخابی مہم چلا رہے ہیں۔
