پروفیسر ڈاکٹر نادیہ نسیم نے یونیورسٹی آف ہیلتھ سائنسز (یو ایچ ایس) لاہور کے وائس چانسلر کے عہدے کا اضافی چارج سنبھال لیا ہے۔ ان کی تقرری سپیشلائزڈ ہیلتھ کیئر اینڈ میڈیکل ایجوکیشن (SHC&ME) ڈیپارٹمنٹ کے 21 جولائی 2026ء کے جاری کردہ نوٹیفکیشن کے تحت عمل میں آئی۔
پروفیسر ڈاکٹر نادیہ نسیم ملک کی ممتاز ماہرِ تعلیم، محقق اور میڈیکل ایجوکیشنسٹ ہیں۔ وہ اس وقت یو ایچ ایس کے شعبہ ماربڈ اناٹومی اینڈ ہسٹوپیتھولوجی کی پروفیسر اور سربراہ کے طور پر خدمات انجام دے رہی ہیں، جبکہ اس سے قبل وہ یونیورسٹی کی پرو وائس چانسلر کی حیثیت سے اپنی تین سالہ مدت بھی مکمل کر چکی ہیں۔
یونیورسٹی آف ہیلتھ سائنسز سے اپنے طویل وابستگی کے دوران انہوں نے متعدد اہم انتظامی ذمہ داریاں بھی نبھائیں، جن میں کنٹرولر امتحانات اور رجسٹرار جیسے کلیدی عہدے شامل ہیں۔ ان ذمہ داریوں کے باعث انہیں تعلیمی، امتحانی اور انتظامی امور میں وسیع تجربہ حاصل ہے۔
ڈاکٹر نادیہ نسیم علامہ اقبال میڈیکل کالج لاہور کی گریجویٹ ہیں۔ انہوں نے ہسٹوپیتھولوجی میں ایم فل اور پی ایچ ڈی کی ڈگریاں یونیورسٹی آف ہیلتھ سائنسز سے حاصل کیں۔ بطور محقق ان کے 120 سے زائد تحقیقی مقالے قومی اور بین الاقوامی جرائد میں شائع ہو چکے ہیں، جبکہ انہیں متعدد قومی و بین الاقوامی ریسرچ گرانٹس، فیلوشپس اور اعزازات بھی مل چکے ہیں۔
یہ تقرری یو ایچ ایس کے سابق وائس چانسلر پروفیسر احسن وحید راٹھور کی چار سالہ مدت مکمل ہونے کے بعد عارضی انتظام کے طور پر کی گئی ہے، اور پروفیسر ڈاکٹر نادیہ نسیم اضافی چارج کے طور پر یونیورسٹی کے وائس چانسلر کی ذمہ داریاں انجام دیں گی۔
