15
وزارت خارجہ نے عوام کو بہتر اور سہل خدمات کی فراہمی کے لیے قونصلر سروسز کے اوقات کار میں نمایاں اضافہ کرتے ہوئے شام کی شفٹ کا باضابطہ آغاز کر دیا ہے۔
وزارت خارجہ کی جانب سے جاری اعلامیے کے مطابق اب قونصلر سروسز پیر سے جمعہ تک صبح 8 بجے سے رات 8 بجے تک مسلسل دستیاب ہوں گی، جس کے بعد شہری روزانہ 12 گھنٹے مختلف قونصلر سہولیات سے استفادہ کر سکیں گے۔
وزارت خارجہ کا کہنا ہے کہ شام کی شفٹ متعارف کرانے کا مقصد عوام کو زیادہ آسان، مؤثر اور بروقت خدمات فراہم کرنا ہے، تاکہ شہریوں کو دستاویزات کی تصدیق اور دیگر قونصلر امور کے لیے زیادہ سہولت میسر آ سکے۔
اس حوالے سے وزارت خارجہ نے قونصلر سروسز کے نئے اوقات کار پر مشتمل عوامی نوٹس بھی جاری کر دیا ہے اور شہریوں سے اپیل کی ہے کہ وہ اپنے قونصلر امور کے لیے نئے شیڈول کے مطابق دفتر سے رجوع کریں۔
