امریکی ایوانِ نمائندگان کے ارکان ریان کیتھ زنکے (ریاست مونٹانا) اور مائیکل جیمز (ریاست واشنگٹن) نے جی ایچ کیو راولپنڈی میں فیلڈ مارشل سید عاصم منیر، چیف آف آرمی اسٹاف اور چیف آف ڈیفنس فورسز سے ملاقات کی، جس میں باہمی دلچسپی کے امور، علاقائی سلامتی، دفاعی تعاون اور اقتصادی روابط کے فروغ پر تبادلہ خیال کیا گیا۔
پاک فوج کے شعبۂ تعلقات عامہ (آئی ایس پی آر) کے مطابق ملاقات کے دوران دونوں فریقوں نے دوطرفہ دفاعی تعاون، خطے کی مجموعی سیکیورٹی صورتحال اور اقتصادی خوشحالی کے فروغ کے امکانات کا جائزہ لیا۔
فیلڈ مارشل سید عاصم منیر نے پاکستان کی وسیع اقتصادی صلاحیتوں کو اجاگر کرتے ہوئے کہا کہ پائیدار علاقائی استحکام کی بنیاد مضبوط اقتصادی ترقی، تجارت کے فروغ اور علاقائی رابطہ سازی پر استوار ہے۔ انہوں نے کہا کہ پاکستان کاروبار دوست ماحول کے فروغ اور غیر ملکی سرمایہ کاری کو راغب کرنے کے لیے جاری ساختی اصلاحات پر عمل پیرا ہے۔
آئی ایس پی آر کے مطابق امریکی وفد نے علاقائی استحکام اور اقتصادی مضبوطی کے لیے پاکستان کے کردار کو سراہا۔ ملاقات میں دوطرفہ اقتصادی روابط، نجی شعبے کے درمیان شراکت داری اور باہمی تجارت کے فروغ کے نئے مواقع پر بھی تبادلہ خیال کیا گیا۔
امریکی وفد نے پاک فوجی قیادت کی پرتپاک میزبانی پر شکریہ ادا کرتے ہوئے امریکہ اور پاکستان کے درمیان اقتصادی، تجارتی اور ادارہ جاتی تعاون کو مزید وسعت دینے کے عزم کا اظہار کیا۔
