راولپنڈی: کمانڈر نیشنل اسٹریٹیجک کمانڈ جنرل سید عامر رضا نے جنرل ہیڈکوارٹرز (جی ایچ کیو) میں فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز سے ملاقات کی، جس میں پیشہ ورانہ امور اور نئی ذمہ داری کے حوالے سے تبادلۂ خیال کیا گیا۔
پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر نے جنرل سید عامر رضا کو نیشنل اسٹریٹیجک کمانڈ کی کمان سنبھالنے پر مبارکباد دی اور ان کے لیے نیک تمناؤں کا اظہار کیا۔
آئی ایس پی آر کے بیان کے مطابق جنرل سید عامر رضا کو کمانڈر نیشنل اسٹریٹیجک کمانڈ مقرر ہونے پر جی ایچ کیو میں گارڈ آف آنر بھی پیش کیا گیا، جس کے بعد انہوں نے یادگارِ شہداء پر حاضری دی۔
اس موقع پر جنرل سید عامر رضا نے یادگارِ شہداء پر پھولوں کی چادر چڑھائی، شہداء کو خراجِ عقیدت پیش کیا اور ملکی سلامتی کے لیے جانوں کا نذرانہ پیش کرنے والے شہداء کے درجات کی بلندی کے لیے فاتحہ خوانی کی۔
آئی ایس پی آر کے مطابق یہ ملاقات پاک فوج کی اعلیٰ عسکری قیادت کے درمیان پیشہ ورانہ روابط اور قومی دفاع سے متعلق امور میں تسلسل کی عکاسی کرتی ہے، جبکہ نئی ذمہ داریاں سنبھالنے والے کمانڈر کے اعزاز میں فوجی روایات کے مطابق گارڈ آف آنر کی تقریب بھی منعقد کی گئی۔
