پاکستان کی مسلح افواج کے سربراہ فیلڈ مارشل عاصم منیر اپنا دورہ مکمل کرنے کے بعد ایران کے دارالحکومت تہران سے وطن واپس روانہ ہوگئے ہیں۔
تفصیلات کے مطابق اپنے دورے کے دوران فیلڈ مارشل عاصم منیر نے ایرانی اعلیٰ قیادت کے ساتھ اہم ملاقاتیں کیں، جن میں ایران کے وزیرِ خارجہ عباس عراقچی کے ساتھ گزشتہ شب ہونے والی طویل نشست بھی شامل تھی۔ اس ملاقات میں خطے کی سیکیورٹی صورتحال اور ایران و امریکا کے درمیان کشیدگی میں کمی کے امکانات پر تبادلۂ خیال کیا گیا۔
ہفتہ کے روز فیلڈ مارشل عاصم منیر نے ایران کے صدر مسعود پیزشکیان سے بھی ملاقات کی، جبکہ بعد ازاں ایرانی پارلیمنٹ کے اسپیکر باقر قالیباف سے الگ ملاقات کی گئی۔ ان ملاقاتوں میں علاقائی سلامتی، دفاعی تعاون اور جاری سفارتی کوششوں پر گفتگو ہوئی۔
ایرانی سرکاری میڈیا کے مطابق ان ملاقاتوں میں پاکستان کے وزیر داخلہ محسن نقوی بھی موجود تھے، جو خطے میں جاری سفارتی رابطوں کا حصہ رہے ہیں۔
ذرائع کے مطابق فیلڈ مارشل عاصم منیر کا آئندہ مرحلے میں عوامی جمہوریہ چین کا دورہ شیڈول ہے، جہاں وہ اعلیٰ سطحی دفاعی اور سفارتی ملاقاتیں کریں گے۔
یہ دورہ ایسے وقت میں مکمل ہوا ہے جب خطے میں ایران، امریکا اور دیگر علاقائی طاقتوں کے درمیان کشیدگی اور مذاکراتی کوششیں بیک وقت جاری ہیں، اور پاکستان کو ثالثی کے ایک اہم کردار کے طور پر دیکھا جا رہا ہے۔
