شمالی کوریا کے رہنما کم جونگ اُن کی بہن اور ورکرز پارٹی آف کوریا کی سینٹرل کمیٹی کی ہیڈ آف ڈیپارٹمنٹ کم یو جونگ نے کہا ہے کہ شمالی کوریا کی جوہری ریاست کی حیثیت حتمی، ناقابلِ واپسی اور ناقابلِ تبدیلی ہے، جبکہ ملک اپنی جوہری دفاعی صلاحیت کو مزید مضبوط بنانے کا عمل جاری رکھے گا۔
روسی خبر رساں ادارے تاس کے مطابق کم یو جونگ نے یہ بیان آسیان ریجنل فورم کے چیئرمین کے اس مطالبے کے ردعمل میں دیا، جس میں جزیرہ نما کوریا کو مکمل طور پر جوہری ہتھیاروں سے پاک کرنے پر زور دیا گیا تھا۔
کم یو جونگ نے کہا کہ شمالی کوریا ایک ذمہ دار جوہری ریاست ہے، جو خطے میں طاقت کا توازن برقرار رکھنے اور جزیرہ نما کوریا سمیت وسیع خطے میں امن و سلامتی کے قیام میں اپنا کردار ادا کر رہا ہے۔ انہوں نے واضح کیا کہ شمالی کوریا کی جوہری حیثیت آئین میں درج ہے، اس لیے کسی بھی غیر قانونی یا غیر پابند دستاویز کے ذریعے اسے تبدیل نہیں کیا جا سکتا۔
انہوں نے آسیان ریجنل فورم کے مؤقف کو مکمل طور پر مسترد کرتے ہوئے کہا کہ شمالی کوریا اپنی قومی سلامتی اور خودمختاری کے تحفظ کے لیے جوہری دفاعی صلاحیت کو ناگزیر سمجھتا ہے۔
کم یو جونگ نے امریکا اور اس کے اتحادیوں کی جانب سے شمالی کوریا کو جوہری ہتھیاروں سے دستبردار کرنے کے مطالبات کو "اسٹریٹجک سوچ کی ناکامی” اور "احمقانہ خواب” قرار دیتے ہوئے کہا کہ یہ تصور اب عملی اور سیاسی اعتبار سے اپنی اہمیت کھو چکا ہے۔
انہوں نے مزید کہا کہ شمالی کوریا کی جوہری دفاعی قوت ملکی خودمختاری کے تحفظ، ریاستی نظام کے استحکام اور بیرونی خطرات کے خلاف قابلِ اعتماد ضمانت ہے، اور پیانگ یانگ اپنی دفاعی صلاحیتوں کو مستقبل میں بھی مزید مضبوط بناتا رہے گا۔
