وسطی امریکی ملک پاناما میں ایک جیل سے 195 قیدیوں کے فرار ہونے کے واقعے نے سیکیورٹی اداروں کو ہائی الرٹ کر دیا ہے۔ فرار کی کوشش کے دوران پیش آنے والے پرتشدد واقعات میں 3 افراد ہلاک جبکہ 9 زخمی ہو گئے۔
چینی خبر رساں ادارے شنہوا کے مطابق پاناما پولیس نے تصدیق کی ہے کہ مجموعی طور پر 195 قیدی جیل سے فرار ہونے میں کامیاب ہوئے تھے۔
پولیس حکام کا کہنا ہے کہ فوری کارروائی کرتے ہوئے اب تک 123 مفرور قیدیوں کو دوبارہ گرفتار کر لیا گیا ہے، جبکہ باقی فرار ہونے والے قیدیوں کی تلاش کے لیے ملک کے مختلف علاقوں میں سرچ آپریشن جاری ہے۔
حکام کے مطابق فرار کے واقعے کے بعد سیکیورٹی فورسز نے متعدد شاہراہوں، داخلی و خارجی راستوں اور حساس مقامات پر نگرانی سخت کر دی ہے تاکہ باقی مفرور افراد کو جلد از جلد گرفتار کیا جا سکے۔
ابتدائی اطلاعات کے مطابق فرار کے دوران جھڑپوں اور فائرنگ کے نتیجے میں 3 افراد جان کی بازی ہار گئے جبکہ 9 افراد زخمی ہوئے، تاہم حکام نے ہلاک اور زخمی ہونے والوں کی مکمل شناخت یا تفصیلات جاری نہیں کیں۔
پاناما کی قانون نافذ کرنے والی ایجنسیاں واقعے کی مکمل تحقیقات کر رہی ہیں تاکہ یہ معلوم کیا جا سکے کہ قیدی کس طرح جیل سے فرار ہونے میں کامیاب ہوئے اور آیا اس میں اندرونی معاونت شامل تھی یا نہیں۔
حکام کا کہنا ہے کہ مفرور قیدیوں کی گرفتاری اور جیل کی سیکیورٹی خامیوں کی نشاندہی کے لیے خصوصی ٹیمیں تشکیل دے دی گئی ہیں۔
