جنوبی کوریا کی قومی ہاکی ٹیم چار میچوں پر مشتمل بین الاقوامی سیریز کھیلنے کے لیے پاکستان پہنچ گئی، جہاں اسلام آباد انٹرنیشنل ایئرپورٹ پر پاکستان سپورٹس بورڈ (PSB) اور بین الصوبائی رابطہ (IPC) ڈویژن کے حکام نے مہمان ٹیم کا استقبال کیا۔
جنوبی کوریا کا وفد 24 کھلاڑیوں اور آفیشلز پر مشتمل ہے، جو اپنے دورۂ پاکستان کے دوران میزبان قومی ہاکی ٹیم کے خلاف چار میچوں کی سیریز میں حصہ لے گا۔
سیریز کا پہلا میچ 30 جولائی کو کھیلا جائے گا، جبکہ دوسرا مقابلہ یکم اگست، تیسرا 4 اگست اور چوتھا و آخری میچ 7 اگست کو ہوگا۔ تمام میچز اسلام آباد کے نصیر بندہ ہاکی اسٹیڈیم میں منعقد کیے جائیں گے۔
دورے کے دوران دونوں ٹیموں کے لیے خصوصی تربیتی کیمپ بھی منعقد کیے جائیں گے، جن کا مقصد کھلاڑیوں کی تکنیکی صلاحیتوں میں بہتری، باہمی تجربات کا تبادلہ اور بین الاقوامی معیار کے مطابق تیاری کو مزید مؤثر بنانا ہے۔
حکام کے مطابق پاکستان اور جنوبی کوریا کے درمیان یہ ہاکی سیریز دونوں ممالک کے کھیلوں کے تعلقات کو مضبوط بنانے اور عالمی سطح پر ہاکی کے فروغ میں اہم کردار ادا کرے گی۔ اس سیریز سے قومی ٹیم کو بھی اعلیٰ معیار کی بین الاقوامی مقابلہ جاتی تیاری کا قیمتی موقع میسر آئے گا۔
