میرپور/اسلام آباد: بنگلادیش کے شہر میرپور میں شروع ہونے والی ساؤتھ ایشین کراٹے چیمپئن شپ کے پہلے ہی روز پاکستانی کھلاڑیوں نے شاندار اور جارحانہ کھیل کا مظاہرہ کرتے ہوئے مجموعی طور پر 10 میڈلز اپنے نام کر لیے ہیں، جن میں دو طلائی (گولڈ)، ایک چاندی (سلور) اور سات کانسی (برانز) کے تمغے شامل ہیں۔ اس شاندار کامیابی کے بعد علاقائی سطح پر پاکستان کا نام ایک بار پھر کراٹے کے میدان میں گونج اٹھا ہے۔
ٹورنامنٹ کے پہلے روز پاکستان کو پہلی بڑی کامیابی میر حمزہ کاسی نے دلائی، جنہوں نے مائنس 75 کلوگرام کیٹیگری میں حریف کو دھول چٹاتے ہوئے طلائی تمغہ حاصل کیا۔ پاکستان کے لیے دوسرا گولڈ میڈل نوجوان ایتھلیٹ طہٰ مصطفیٰ نے جونیئر مائنس 63 کلوگرام کیٹیگری میں شاندار فائٹ کا مظاہرہ کرتے ہوئے اپنے نام کیا۔ مردوں کے دیگر مقابلوں میں میر واعظ خان نے سلور میڈل حاصل کیا، جبکہ شمش افتخار اور میر حمزہ کانسی کے تمغے جیتنے میں کامیاب رہے۔
پاکستانی خواتین کھلاڑیوں نے بھی بین الاقوامی سطح پر ملک کا مان بڑھایا۔ ویمنز ایونٹس کے سخت مقابلوں میں انیتا فاطمہ، حافظہ اقرا منور، اقصیٰ اعظم، لائبہ ضیا اور رابعہ فاروق نے بہترین تکنیک کا مظاہرہ کرتے ہوئے پاکستان کے لیے کانسی کے تمغے جیتے۔ پہلے روز کے اختتام پر پاکستانی دستہ 2 گولڈ، 1 سلور اور 7 برانز میڈلز کے ساتھ ٹورنامنٹ میں مضبوط پوزیشن برقرار رکھنے میں کامیاب رہا ہے۔
