اسلام آباد میں منعقدہ پاکستان مکسڈ مارشل آرٹس فیڈریشن (PAKMMAF) کی پہلی کنٹینڈر سیریز میں سنسنی خیز مقابلے دیکھنے میں آئے، جہاں 52 کلوگرام کیٹیگری میں اورنگزیب احمد نے اپنے حریف فیضان کو ناک آؤٹ کر کے شاندار کامیابی حاصل کر لی۔
کنٹینڈر سیریز کے پہلے ایک روزہ ایونٹ میں مجموعی طور پر 12 فائٹس کا انعقاد کیا گیا، جن میں ملک بھر کے باصلاحیت فائٹرز نے اپنی صلاحیتوں کا بھرپور مظاہرہ کیا۔ اس ایونٹ کا مقصد پاکستان میں مکسڈ مارشل آرٹس (MMA) کے فروغ، نوجوان ٹیلنٹ کی نشاندہی اور عالمی سطح کے کھلاڑی تیار کرنا ہے۔
میچ کے بعد میڈیا سے گفتگو کرتے ہوئے اورنگزیب احمد نے کہا کہ وہ آئندہ ہونے والی بین الاقوامی مکسڈ مارشل آرٹس ورلڈ چیمپئن شپ کی بھرپور تیاری کر رہے ہیں۔ انہوں نے بتایا کہ انہیں بچپن سے ہی ایم ایم اے کا شوق تھا اور عالمی شہرت یافتہ فائٹر حبیب نورمحمدوف ان کے پسندیدہ کھلاڑی ہیں۔ ان کے مطابق والدہ نے ان کے شوق کی حوصلہ افزائی کی اور ہمیشہ مکمل تعاون فراہم کیا۔
اورنگزیب احمد، پنجاب کی سینئر وزیر مریم اورنگزیب کے صاحبزادے ہیں، جبکہ فیڈریشن انہیں مستقبل کا ایک باصلاحیت فائٹر قرار دے رہی ہے۔
ایونٹ کی ایک اور نمایاں بات سابق آئی ایم ایم اے ایف ایشین چیمپئن اور 2025 آئی ایم ایم اے ایف فائٹر آف دی ایئر شہاب علی کی پروفیشنل ایم ایم اے میں پہلی شرکت تھی۔ فیڈریشن کے مطابق شہاب علی میں مستقبل میں عالمی تنظیم UFC تک رسائی حاصل کرنے کی بھرپور صلاحیت موجود ہے۔
پاکستان مکسڈ مارشل آرٹس فیڈریشن کے صدر عمر احمد نے کہا کہ کنٹینڈر سیریز کے ذریعے ملک میں پہلی مرتبہ ایم ایم اے کے فروغ کے لیے ایک منظم ترقیاتی نظام متعارف کرایا گیا ہے۔ اس نظام کے تحت اسکول، کالج اور یونیورسٹی سطح سے باصلاحیت کھلاڑیوں کو منتخب کر کے کنٹینڈر سیریز، ایشیائی اور عالمی چیمپئن شپ تک رسائی دی جائے گی۔
فیڈریشن نے یہ بھی اعلان کیا کہ پاکستان پہلی مرتبہ ابوظہبی میں منعقد ہونے والی آئی ایم ایم اے ایف یوتھ ورلڈ چیمپئن شپ میں بھی شرکت کرے گا، جہاں نوجوان پاکستانی فائٹرز عالمی سطح پر اپنی صلاحیتوں کا مظاہرہ کریں گے۔
