پاکستان کرکٹ ٹیم دو ٹیسٹ میچوں کی سیریز کھیلنے کے لیے ویسٹ انڈیز روانہ ہو گئی ہے۔ قومی اسکواڈ اسلام آباد انٹرنیشنل ایئرپورٹ سے براستہ دوحہ اور لندن ویسٹ انڈیز کے لیے روانہ ہوا۔
روانگی سے قبل قومی ٹیم نے راولپنڈی کرکٹ اسٹیڈیم میں تین روزہ تربیتی کیمپ میں بھرپور پریکٹس کی، جبکہ تیاریوں کو حتمی شکل دینے کے لیے دو روزہ سیناریو بیسڈ پریکٹس میچ بھی کھیلا گیا۔
ویسٹ انڈیز پہنچنے کے بعد پاکستانی ٹیم 18 سے 21 جولائی تک چار روزہ پریکٹس میچ میں حصہ لے گی تاکہ مقامی کنڈیشنز سے ہم آہنگ ہو سکے۔
پاکستان اور ویسٹ انڈیز کے درمیان آئی سی سی ورلڈ ٹیسٹ چیمپئن شپ کے تحت دو ٹیسٹ میچ 25 جولائی سے 10 اگست کے دوران کھیلے جائیں گے۔ پہلا ٹیسٹ 25 جولائی جبکہ دوسرا 2 اگست سے شروع ہوگا۔ میچز برائن لارا کرکٹ اکیڈمی، ٹوروبا اور کوئینز پارک اوول میں منعقد ہوں گے، جبکہ قومی ٹیم پورٹ آف اسپین اور ٹوروبا میں قیام کرے گی۔
پاکستان کے 16 رکنی اسکواڈ میں کپتان بابر اعظم، شان مسعود، امام الحق، اذان اویس، عبداللہ فضل، سلمان علی آغا، غازی غوری، محمد رضوان، ساجد خان، علی عثمان، عامر جمال، محمد علی، محمد عباس، عبید شاہ، اویس ظفر اور خرم شہزاد شامل ہیں۔
واضح رہے کہ شان مسعود تین سال تک ٹیسٹ ٹیم کی قیادت کرنے کے بعد اب بطور کھلاڑی ٹیم کا حصہ ہیں۔
ویسٹ انڈیز کے دورے کے بعد پاکستانی ٹیم تین ٹیسٹ میچوں کی سیریز کھیلنے کے لیے انگلینڈ روانہ ہوگی، جہاں دونوں ٹیموں کے درمیان ٹیسٹ میچز 19 اگست، 27 اگست اور 9 ستمبر سے کھیلے جائیں گے۔
