نیویارک/نیو جرسی: دنیا کے سب سے بڑے کھیل کا سب سے بڑا مقابلہ آج ہونے جا رہا ہے۔ فیفا ورلڈ کپ 2026 کا سنسنی خیز اور تاریخی فائنل معرکہ آج نصف شب نیو جرسی کے میٹ لائف اسٹیڈیم میں ارجنٹائن اور اسپین کے درمیان کھیلا جائے گا۔ اس عالمی ٹکراد میں ارجنٹائن کے لیجنڈری فٹ بالر لیونل میسی اور اسپین کے ابھرتے ہوئے اسٹار لامین یمال دنیا بھر کے شائقینِ کھیل کی خصوصی توجہ کا مرکز بنے ہوئے ہیں۔ پاکستانی وقت کے مطابق یہ فائنل مقابلہ رات 12 بجے شروع ہوگا، جس کے لیے کراچی، لاہور سمیت ملک کے مختلف شہروں میں شائقین کی سہولت کے لیے بڑی اسکرینوں پر میچ دکھانے کے خصوصی انتظامات کیے گئے ہیں۔
نیو جرسی اسٹیڈیم میں فائنل کک آف سے قبل ایک یادگار اور شاندار ثقافتی تقریب منعقد ہوگی، جس کے مرکزی فنکار امریکی گلوکار اور ریپر پوسٹ میلون ہوں گے، جبکہ ای جی او ٹی ایوارڈ یافتہ نامور گلوکارہ جینیفر ہڈسن امریکی قومی ترانہ پیش کریں گی۔ فیفا کی جانب سے شائقین کو محظوظ کرنے کے لیے ہاف ٹائم شو کو بھی یادگار بنایا گیا ہے، جس میں عالمی شہرت یافتہ پاپ اسٹار جسٹن بیبر، میڈونا، شکیرا، جنوبی کوریا کا مقبول ترین بینڈ بی ٹی ایس، نائجیرین گلوکار برنا بوائے اور وینزویلا کے معروف آرکسٹرا کنڈکٹر گستاوو دودامل اپنی پرفارمنس کا جادو جگائیں گے۔
فیفا کی تاریخ میں پہلی بار ایک منفرد روایت کا آغاز کیا جا رہا ہے؛ فیفا ورلڈ کپ 2026 کی فاتح ٹیم کو روایتی ٹرافی اور طلائی تمغوں کے ساتھ خصوصی طور پر تیار کردہ ‘چیمپئن شپ رِنگز’ بھی دی جائیں گی، جو کسی بھی فیفا ٹورنامنٹ کی تاریخ میں پہلا موقع ہے۔ اس میگا ایونٹ کے سحر کے باعث نیویارک اور نیو جرسی میں سیاحت کا شعبہ عروج پر پہنچ چکا ہے اور ہوٹلوں کے کرائے آسمان سے باتیں کر رہے ہیں۔ شائقین سے معمول کے 150 سے 500 ڈالر فی رات والے کمروں کا کرایہ 1500 سے لے کر 4500 ڈالر (تقریباً 12 لاکھ 60 ہزار پاکستانی روپے) فی رات تک وصول کیا جا رہا ہے، جو اس فائنل کے بے پناہ عالمی کریز کو ظاہر کرتا ہے۔
