لاہور: پاکستان ہاکی فیڈریشن (پی ایچ ایف) نے ملک میں ہاکی کے سنہری دور کی بحالی اور نچلی سطح پر نئے ٹیلنٹ کی تلاش کے لیے "قومی انڈر-15 سکولز ہاکی ڈویلپمنٹ پروگرام” شروع کرنے کا اعلان کر دیا ہے۔ اس منصوبے کا مقصد سکولوں میں ہاکی کے فروغ، نوجوان کھلاڑیوں کی تربیت اور مستقبل کی قومی ٹیم کے لیے مضبوط بنیاد فراہم کرنا ہے۔
پی ایچ ایف کے مطابق یہ پروگرام صوبائی حکومتوں، ڈویژنل کمشنرز، صوبائی سپورٹس ڈیپارٹمنٹس، محکمہ تعلیم، صوبائی سپورٹس بورڈز، ضلعی انتظامیہ اور الحاق شدہ ہاکی ایسوسی ایشنز کے باہمی تعاون سے نافذ کیا جائے گا، جبکہ اس کا باقاعدہ آغاز آئندہ ماہ سے ہوگا۔
پروگرام کے پہلے مرحلے میں منتخب بوائز اور گرلز سکول ٹیموں کو ہاکی کٹس فراہم کی جائیں گی۔ پی ایچ ایف نے آئندہ دو ماہ کے دوران ملک بھر کے 600 سکولوں کو ہاکی کٹس تقسیم کرنے کا ہدف مقرر کیا ہے، جسے سکول ہاکی کی تاریخ کا سب سے بڑا ترقیاتی اقدام قرار دیا جا رہا ہے۔
ہاکی کٹس کی فراہمی کے بعد منتخب ٹیموں کو مستند کوچز کی نگرانی میں 30 روزہ خصوصی تربیتی کیمپوں میں جدید انداز میں تربیت دی جائے گی۔ تربیت مکمل ہونے پر یہ ٹیمیں ضلعی اور صوبائی سطح کے مقابلوں میں حصہ لیں گی تاکہ بہترین کھلاڑیوں کی نشاندہی کی جا سکے۔
پی ایچ ایف کا کہنا ہے کہ محکمہ سکول ایجوکیشن تمام سکولوں کے پرنسپلز کو ہدایت جاری کرے گا کہ وہ طلبہ کو اس پروگرام میں بھرپور شرکت کی ترغیب دیں اور سکولوں میں ہاکی کو ایک مسابقتی کھیل کے طور پر فروغ دیں۔
فیڈریشن نے رواں سال کے اختتام پر "نیشنل انڈر-15 سکولز ہاکی چیمپئن شپ” کے انعقاد کا بھی اعلان کیا ہے، جس میں صوبائی سطح پر کامیاب ہونے والی بہترین سکول ٹیمیں قومی اعزاز اور خطیر انعامات کے لیے مدمقابل ہوں گی۔
چیمپئن ٹیم کو 30 لاکھ روپے، رنرز اپ ٹیم کو 20 لاکھ روپے جبکہ تیسری پوزیشن حاصل کرنے والی ٹیم کو 10 لاکھ روپے نقد انعام دیا جائے گا۔
پی ایچ ایف حکام کے مطابق اس چیمپئن شپ کے دوران نمایاں کارکردگی دکھانے والے باصلاحیت کھلاڑیوں کو شارٹ لسٹ کر کے پاکستان نیشنل انڈر-15 ہاکی ٹیم تشکیل دی جائے گی، جسے جدید تقاضوں کے مطابق تربیت فراہم کی جائے گی۔ یہ ٹیم آئندہ دو برس تک مختلف بین الاقوامی مقابلوں میں پاکستان کی نمائندگی کرے گی، جس سے سکول ہاکی سے قومی ٹیم تک کھلاڑیوں کی ترقی کا ایک مؤثر اور پائیدار نظام قائم ہونے کی توقع ہے۔
