ایران کی قومی فٹبال ٹیم نے فیفا ورلڈ کپ 2026 کی تیاریوں کے سلسلے میں ترکیہ پہنچ گئی جہاں ٹیم تربیتی کیمپ کے ساتھ ساتھ امریکا کے ویزوں کی کارروائی بھی مکمل کرے گی۔ ایرانی میڈیا رپورٹس کے مطابق قومی اسکواڈ انطالیہ میں کیمپ قائم کرے گا اور وہاں دو دوستانہ وارم اپ میچز بھی کھیلے جائیں گے تاکہ عالمی کپ سے قبل ٹیم کی تیاریوں کو حتمی شکل دی جا سکے۔
رپورٹس کے مطابق ایران کے 22 مقامی کھلاڑیوں اور کوچنگ اسٹاف پر مشتمل دستہ ترکیہ پہنچ چکا ہے جبکہ قومی ٹیم کے ہیڈ کوچ امیر قلعه نوی نے تصدیق کی ہے کہ کھلاڑی اسی دوران امریکی ویزا درخواستیں بھی جمع کروائیں گے۔ انہوں نے کہا کہ ٹیم کی مکمل توجہ ورلڈ کپ کی تیاریوں پر مرکوز ہے اور کھلاڑی بہترین کارکردگی کے لیے پُرعزم ہیں۔
ایران کی ورلڈ کپ میں شرکت ایک ایسے وقت میں سامنے آ رہی ہے جب تہران اور واشنگٹن کے درمیان سیاسی کشیدگی بدستور برقرار ہے۔ حالیہ مہینوں میں دونوں ممالک کے درمیان بڑھتے ہوئے تنازعات اور سیکیورٹی خدشات کے باعث ایران نے اپنے میچز امریکا کے بجائے میکسیکو منتقل کرنے کی تجویز دی تھی، تاہم فیفا نے ٹورنامنٹ شیڈول میں کسی قسم کی تبدیلی سے انکار کر دیا۔
امریکی صدر ڈونلڈ ٹرمپ نے گزشتہ ماہ ایران کی ٹیم کی شرکت کے حوالے سے کہا تھا کہ “انہیں کھیلنے دیں”، جبکہ امریکی حکام نے واضح کیا تھا کہ مسئلہ ایرانی کھلاڑیوں سے نہیں بلکہ بعض آفیشلز کے ممکنہ سیاسی روابط سے متعلق ہو سکتا ہے۔
فیفا حکام اور ایرانی فٹبال فیڈریشن کے درمیان حالیہ ملاقاتوں کے بعد ایران کی ورلڈ کپ میں شرکت کے امکانات مزید مضبوط ہو گئے ہیں۔ ایران گروپ مرحلے میں نیوزی لینڈ، بیلجیئم اور مصر کے خلاف میچز کھیلے گا، جنہیں عالمی فٹبال شائقین کی جانب سے خاص دلچسپی سے دیکھا جا رہا ہے۔
