راولپنڈی: پاکستان کے دورے پر آئے ایران کے وزیر داخلہ اسکندر مومنی نے جنرل ہیڈکوارٹرز (جی ایچ کیو) راولپنڈی میں فیلڈ مارشل سید عاصم منیر سے اہم ملاقات کی، جس میں باہمی دلچسپی، علاقائی و دوطرفہ سلامتی اور مؤثر بارڈر مینجمنٹ سمیت مختلف امور پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران دونوں رہنماؤں نے پاکستان اور ایران کے درمیان سیکیورٹی تعاون کو مزید مضبوط بنانے اور سرحدی علاقوں میں مؤثر رابطہ کاری بڑھانے پر زور دیا۔
ملاقات میں ایرانی وزیر داخلہ اسکندر مومنی نے خطے میں کشیدگی کم کرنے اور امن و استحکام کے فروغ کے لیے پاکستان کی مستقل سفارتی کوششوں کو سراہتے ہوئے کہا کہ پاکستان نے علاقائی تنازعات میں تعمیری کردار ادا کیا ہے۔
انہوں نے پاکستان کو خطے میں امن و استحکام کا ایک اہم ستون قرار دیتے ہوئے کہا کہ علاقائی سلامتی کے لیے اسلام آباد کا سفارتی کردار نہایت اہم اور مؤثر ہے۔
آئی ایس پی آر کے مطابق ملاقات کے اختتام پر دونوں ممالک نے علاقائی سلامتی، مؤثر بارڈر مینجمنٹ اور مشترکہ خوشحالی کے لیے قریبی رابطے اور تعاون جاری رکھنے کے عزم کا اعادہ کیا۔ پاکستان اور ایران نے اس بات پر بھی اتفاق کیا کہ باہمی اعتماد اور تعاون کے فروغ سے نہ صرف دوطرفہ تعلقات مزید مستحکم ہوں گے بلکہ پورے خطے میں امن اور استحکام کو بھی تقویت ملے گی۔
