اسلام آباد: وزارتِ مذہبی امور نے اعلان کیا ہے کہ نیشنل آئی ٹی بورڈ (NITB) کے تیار کردہ آن لائن حج پورٹل کے ذریعے صرف آٹھ دنوں میں ایک لاکھ پچاس ہزار سے زائد حج درخواستوں کی رجسٹریشن مکمل کر لی گئی ہے، جسے پاکستان میں ای گورننس اور ڈیجیٹل سرکاری خدمات کی فراہمی کے حوالے سے ایک اہم سنگ میل قرار دیا جا رہا ہے۔
وزارتِ مذہبی امور کے ترجمان عمر بٹ کے مطابق موجودہ حکومت کے وژن کے تحت حج انتظامات کو مکمل طور پر ڈیجیٹل بنانے کے منصوبے پر تیزی سے عمل جاری ہے۔ اس مقصد کے لیے آن لائن حج پورٹل اور "پاک حج” موبائل ایپ متعارف کرائی گئی ہے، جس کے ذریعے عازمین حج گھر بیٹھے آسان، شفاف اور تیز رفتار انداز میں اپنی رجسٹریشن مکمل کر سکتے ہیں۔
ترجمان نے بتایا کہ رجسٹریشن کے ابتدائی آٹھ روز کے دوران ایک لاکھ پچاس ہزار سے زائد درخواست گزاروں نے کسی بھی دفتری کارروائی یا طویل قطار کے بغیر آن لائن اپنی حج رجسٹریشن مکمل کی، جو ڈیجیٹل گورننس کے فروغ کی ایک نمایاں مثال ہے۔
وزارت کے مطابق حکومت اب حج واجبات کی وصولی کے نظام کو بھی مکمل طور پر ڈیجیٹل بنانے کی جانب بڑھ رہی ہے۔ وزیراعظم کی ہدایات کے مطابق رجسٹریشن کے بعد حج اخراجات کی ادائیگی کا مرحلہ بھی آن لائن پورٹل اور "پاک حج” ایپ سے منسلک کیا جا رہا ہے، جبکہ اس مقصد کے لیے ون لنک (1LINK) کے ذریعے جدید ڈیجیٹل ادائیگی کا نظام متعارف کرانے کی تیاری آخری مراحل میں ہے۔
اس نئے نظام کے تحت عازمین حج بینکوں یا سرکاری دفاتر کے چکر لگائے بغیر گھر بیٹھے اپنی حج فیس ادا کر سکیں گے، جس سے رجسٹریشن سے لے کر ادائیگی تک پورا عمل چند کلکس میں مکمل کیا جا سکے گا۔
ماہرین کے مطابق یہ ڈیجیٹل ماڈل بیرونِ ملک مقیم پاکستانیوں کے لیے بھی بڑی سہولت ثابت ہوگا، کیونکہ وہ دنیا کے کسی بھی حصے سے اپنی حج رجسٹریشن، درخواست کی پیش رفت اور حج واجبات کی ادائیگی آن لائن انجام دے سکیں گے۔
وزارتِ مذہبی امور نے حج پورٹل اور "پاک حج” موبائل ایپ میں متعدد نئے فیچرز بھی شامل کیے ہیں، جن کے ذریعے درخواست گزار اپنی رجسٹریشن، درخواست کی موجودہ صورتحال اور دیگر ضروری معلومات فوری طور پر حاصل کر سکتے ہیں۔
حکام کا کہنا ہے کہ ان اقدامات کا مقصد حج آپریشن کو مکمل طور پر شفاف، جدید، عوام دوست اور ڈیجیٹل خطوط پر استوار کرنا ہے تاکہ عازمین کو زیادہ آسان، محفوظ اور معیاری خدمات فراہم کی جا سکیں۔
