ابوظہبی: متحدہ عرب امارات نے لبنان کے سفر پر عائد پابندی ختم کرتے ہوئے اپنے شہریوں کو فوری طور پر وہاں جانے کی اجازت دے دی ہے۔ وزارتِ خارجہ کے مطابق یہ فیصلہ پیر 29 جون 2026 سے نافذ العمل ہو گیا ہے۔
سرکاری خبر رساں ایجنسی وام (WAM) کے مطابق وزارتِ خارجہ نے اعلان کیا ہے کہ اماراتی شہری اب لبنان کا سفر کر سکتے ہیں، تاہم روانگی سے قبل انہیں وزارت کے قونصلر سروسز پلیٹ فارم پر اپنی سفری معلومات رجسٹر کرانا لازمی ہوگا تاکہ ہنگامی صورتحال میں انہیں قونصلر معاونت فراہم کی جا سکے۔
متحدہ عرب امارات نے اپریل 2026 میں مشرق وسطیٰ میں بڑھتی ہوئی کشیدگی، ایران، عراق اور لبنان کی سکیورٹی صورتحال اور علاقائی جنگ کے خدشات کے باعث اپنے شہریوں کے ان ممالک کے سفر پر عارضی پابندی عائد کی تھی۔
حکام کے مطابق خطے میں سکیورٹی صورتحال میں نسبتاً بہتری اور جنگ بندی کے بعد حالات کا ازسرِ نو جائزہ لینے کے بعد لبنان کے لیے سفری پابندی ختم کرنے کا فیصلہ کیا گیا ہے۔
دوسری جانب ایران اور متحدہ عرب امارات کے درمیان فضائی رابطوں کی بحالی بھی شروع ہو گئی ہے۔ ایرانی سرکاری میڈیا کے مطابق جنگ کے بعد پہلی مرتبہ تہران اور دبئی کے درمیان مسافر پروازیں دوبارہ بحال کر دی گئی ہیں، جسے خطے میں معمول کی سرگرمیوں کی بحالی کی جانب ایک اہم پیش رفت قرار دیا جا رہا ہے۔
تجزیہ کاروں کے مطابق لبنان کے لیے سفری اجازت اور ایران کے ساتھ فضائی روابط کی بحالی اس بات کی نشاندہی کرتی ہے کہ خلیجی ممالک خطے میں کشیدگی کم ہونے کے بعد معمول کے سفارتی اور سفری روابط بحال کرنے کی جانب پیش رفت کر رہے ہیں۔
