یورپی یونین کے ممتاز تعلیمی پروگرام Erasmus Mundus Joint Master’s Scholarships میں پاکستان نے ایک بار پھر نمایاں کامیابی حاصل کرتے ہوئے 2026 کے لیے مکمل فنڈڈ اسکالرشپس حاصل کرنے والے ممالک میں دنیا بھر میں پہلی پوزیشن حاصل کر لی ہے۔ اس طرح پاکستان مسلسل پانچویں سال اس باوقار بین الاقوامی پروگرام میں سب سے زیادہ کامیاب امیدواروں والا ملک بن گیا ہے۔
یورپی یونین کی جانب سے جاری کردہ نتائج کے مطابق 2026 کے سائیکل میں 98 پاکستانی طلبہ Erasmus Mundus Joint Master’s Scholarships کے لیے منتخب ہوئے ہیں۔ یہ کامیابی نہ صرف پاکستانی نوجوانوں کی علمی صلاحیتوں کا اعتراف ہے بلکہ پاکستان اور یورپی یونین کے درمیان تعلیم، تحقیق اور علمی تعاون کے بڑھتے ہوئے تعلقات کی بھی عکاسی کرتی ہے۔
برسلز میں پاکستان کے سفارت خانے اور پاکستان میں یورپی یونین کے وفد نے اس کامیابی پر خوشی کا اظہار کرتے ہوئے منتخب طلبہ کو مبارکباد دی۔ دونوں اداروں نے اسے پاکستان اور یورپی یونین کے درمیان مضبوط تعلیمی شراکت داری کا ایک اہم سنگ میل قرار دیا۔
اعداد و شمار کے مطابق پاکستان 98 اسکالرشپس کے ساتھ دنیا بھر میں پہلے نمبر پر رہا، جبکہ بنگلہ دیش 80 اسکالرشپس کے ساتھ دوسرے، بھارت 75 کے ساتھ تیسرے، امریکا 68 کے ساتھ چوتھے اور اٹلی 67 کامیاب امیدواروں کے ساتھ پانچویں نمبر پر رہا۔ اس سال دنیا کے 135 ممالک کے طلبہ کو مجموعی طور پر 1,872 Erasmus Mundus اسکالرشپس دی گئی ہیں۔
ماہرین کے مطابق Erasmus Mundus دنیا کے سب سے زیادہ مسابقتی تعلیمی پروگراموں میں شمار ہوتا ہے، جہاں ہر سال ہزاروں طلبہ درخواست دیتے ہیں جبکہ کامیابی حاصل کرنے والوں کی تعداد نسبتاً محدود ہوتی ہے۔ پاکستانی طلبہ کی مسلسل کامیابی اس بات کا ثبوت ہے کہ ملک کے نوجوان بین الاقوامی سطح پر اپنی تعلیمی قابلیت منوا رہے ہیں۔
پاکستانی سفارت خانے نے اپنے بیان میں کہا کہ یہ کامیابی پاکستان کے باصلاحیت نوجوانوں کی محنت، علمی قابلیت اور عالمی معیار کی تعلیم حاصل کرنے کے عزم کا مظہر ہے۔ سفارت خانے نے اس موقع پر پاکستان اور یورپی یونین کے درمیان سائنس ڈپلومیسی، تحقیق، اختراعات، اعلیٰ تعلیم اور ابھرتی ہوئی ٹیکنالوجیز کے شعبوں میں تعاون مزید بڑھانے کے عزم کا بھی اعادہ کیا۔
بیان میں سابق فرسٹ سیکرٹری محمد عدیل کی خدمات کو بھی سراہا گیا، جنہوں نے برسلز میں اپنی تعیناتی کے دوران پاکستان اور یورپی یونین کے درمیان سائنس، ٹیکنالوجی اور تعلیمی تعاون کو فروغ دینے میں اہم کردار ادا کیا۔
Erasmus Mundus پروگرام کے تحت منتخب طلبہ کو یورپ کی متعدد معروف جامعات میں مشترکہ ماسٹرز ڈگری حاصل کرنے کا موقع ملتا ہے۔ اس مکمل فنڈڈ اسکالرشپ میں ٹیوشن فیس، ماہانہ وظیفہ، سفری اخراجات، رہائش کے لیے ابتدائی معاونت اور میڈیکل انشورنس شامل ہوتی ہے۔
اس پروگرام کے تحت طلبہ کو فرانس، جرمنی، اٹلی، اسپین، نیدرلینڈز، بیلجیم، سویڈن، پرتگال اور فن لینڈ سمیت مختلف یورپی ممالک کی یونیورسٹیوں میں تعلیم حاصل کرنے اور بین الاقوامی تجربہ حاصل کرنے کا موقع ملتا ہے۔
تعلیمی ماہرین کا کہنا ہے کہ Erasmus Mundus میں پاکستان کی مسلسل کامیابیاں نہ صرف ملکی تعلیمی معیار کے لیے حوصلہ افزا ہیں بلکہ عالمی سطح پر پاکستانی نوجوانوں کی مثبت شناخت کو بھی مضبوط بنا رہی ہیں۔
