لاہور: وزیراعلیٰ پنجاب مریم نواز شریف نے سانحۂ کاہنہ کے متاثرین کے غم کو عملی اقدامات میں تبدیل کرتے ہوئے صوبے بھر میں رہائشی مکانات کو محفوظ بنانے کے لیے "اپنا گھر، محفوظ گھر” پروگرام شروع کرنے کا فیصلہ کر لیا ہے۔
وزیراعلیٰ کی زیر صدارت "اپنی چھت، اپنا گھر” اور "اپنی زمین، اپنا گھر” پروگراموں سے متعلق اعلیٰ سطحی اجلاس میں فلیگ شپ ہاؤسنگ منصوبوں کی پیش رفت کا جائزہ لیا گیا، جہاں موجودہ گھروں کی مرمت اور مضبوطی کے لیے نئی سہولت متعارف کرانے کی منظوری دی گئی۔
اجلاس میں فیصلہ کیا گیا کہ خستہ حال، بوسیدہ اور کمزور چھتوں والے گھروں کی مرمت اور بحالی کے لیے مستحق خاندانوں کو 5 لاکھ روپے تک مالی معاونت فراہم کی جائے گی۔
اس کے علاوہ وہ شہری جو اپنے گھروں پر نئی منزل یا اضافی فلور تعمیر کرنا چاہتے ہیں، انہیں 10 لاکھ روپے تک سود سے پاک آسان اقساط پر قرض فراہم کرنے کی تجویز بھی منظور کر لی گئی۔
وزیراعلیٰ مریم نواز شریف نے اجلاس سے خطاب کرتے ہوئے کہا کہ بحران کے وقت محض بیانات نہیں بلکہ عملی اقدامات ہی اچھی حکمرانی کی اصل پہچان ہوتے ہیں۔ انہوں نے متعلقہ حکام کو ہدایت کی کہ گھروں کی تعمیر اور بہتری کے لیے قرض کے حصول کا عمل مزید آسان بنایا جائے تاکہ غریب اور متوسط طبقے کے شہری بلا رکاوٹ اس سہولت سے استفادہ کر سکیں۔
اجلاس میں بتایا گیا کہ "اپنی چھت، اپنا گھر” پروگرام کے تحت اب تک ایک لاکھ سے زائد مکانات مکمل کیے جا چکے ہیں، جبکہ ایک لاکھ 80 ہزار سے زائد بے گھر خاندانوں کے لیے سود سے پاک قرضوں کی منظوری دی گئی ہے۔
بریفنگ کے مطابق اب تک ایک لاکھ 70 ہزار خاندانوں کو قرض جاری کیا جا چکا ہے، جبکہ اس منصوبے کے لیے 217 ارب 80 کروڑ روپے مختص کیے گئے ہیں۔
حکام نے اجلاس کو آگاہ کیا کہ پنجاب بھر میں ایک لاکھ 34 ہزار 343 گھر مکمل ہو چکے ہیں جبکہ 27 ہزار سے زائد مکانات تکمیل کے آخری مراحل میں ہیں۔ منصوبے کے تحت اب تک 12 لاکھ 78 ہزار سے زائد بے گھر خاندان درخواستیں جمع کرا چکے ہیں۔
اجلاس میں "اپنی زمین، اپنا گھر” پروگرام کی پیش رفت بھی پیش کی گئی، جس کے تحت پنجاب کے 23 اضلاع میں 2 ہزار مفت پلاٹ فراہم کیے جا چکے ہیں۔
وزیراعلیٰ مریم نواز شریف نے ہدایت کی کہ جن خاندانوں کو مفت پلاٹ دیے گئے ہیں، انہیں گھر تعمیر کرنے کے لیے سود سے پاک قرضوں کی سہولت بھی فراہم کی جائے تاکہ وہ جلد از جلد اپنی رہائش تعمیر کر سکیں۔
انہوں نے واضح کیا کہ "اپنی چھت، اپنا گھر” اور اس سے منسلک تمام ہاؤسنگ پروگراموں میں کسی قسم کی غفلت برداشت نہیں کی جائے گی اور عوام کو زیادہ سے زیادہ سہولت فراہم کرنا حکومت کی اولین ترجیح رہے گی۔
