اسلام آباد: پاکستان کے معروف گلوکار سجاد علی نے اپنے مقبول گیت "راوی” کے ایک بھارتی ٹی وی ریئلٹی شو میں نشر ہونے کے بعد سامنے آنے والی خبروں پر وضاحت جاری کرتے ہوئے کہا ہے کہ انہوں نے کسی بھی بھارتی ٹی وی چینل یا پروگرام کو اپنے گانوں کے استعمال یا کاپی رائٹ کی کوئی اجازت نہیں دی۔
سجاد علی نے اپنے انسٹاگرام اکاؤنٹ پر جاری ویڈیو پیغام میں دنیا بھر میں موجود اپنے مداحوں کا شکریہ ادا کرتے ہوئے کہا کہ انہیں خوشی ہوتی ہے جب لوگ ان کے گانوں کے کور ورژن بناتے ہیں اور وہ اکثر ایسی ویڈیوز دیکھتے اور ان پر اپنے تاثرات بھی دیتے ہیں۔
انہوں نے کہا کہ حالیہ دنوں سوشل میڈیا پر ایک ویڈیو وائرل ہوئی، جس میں بھارت کے پنجابی گلوکاری کے ریئلٹی شو "وائس آف پنجاب ماسٹر چیمپس” کے دسویں سیزن میں دو کم عمر بچوں نے ان کا معروف گیت "راوی” پیش کیا۔ اس ویڈیو کے بعد پاکستان میں یہ تاثر پیدا کیا گیا کہ انہوں نے بھارتی پروگرام کو اپنے گانے استعمال کرنے کی اجازت دی، جبکہ پاکستان کے ایک پروگرام میں ایسا کرنے سے انکار کیا تھا۔
گلوکار نے ان تمام دعوؤں کو مسترد کرتے ہوئے واضح کیا کہ بھارتی چینل نے ان کا گانا بغیر اجازت استعمال کیا ہے۔
انہوں نے کہا کہ نہ تو متعلقہ بھارتی چینل نے ان سے کوئی اجازت حاصل کی اور نہ ہی کاپی رائٹ کے حوالے سے کسی قسم کی منظوری لی، بلکہ گانا براہِ راست نشر کر دیا گیا۔
سجاد علی کے مطابق ان کی قانونی ٹیم اب اس معاملے پر متعلقہ بھارتی چینل سے باضابطہ رابطہ کرے گی اور کاپی رائٹ کی خلاف ورزی کے حوالے سے قانونی کارروائی کا جائزہ لے گی۔
انہوں نے پاکستان آئیڈل سے متعلق گزشتہ سال سامنے آنے والے تنازع کا بھی ذکر کرتے ہوئے کہا کہ اس معاملے میں ان کے مؤقف کو غلط انداز میں پیش کیا گیا اور ان کے بیانات کو سیاق و سباق سے ہٹ کر بیان کیا گیا، جس پر انہیں افسوس ہے۔
سجاد علی نے کہا کہ وہ ہمیشہ اپنے مداحوں کی محبت اور فنکاروں کی جانب سے ان کے گانوں کی پیشکش کو سراہتے ہیں، تاہم کسی بھی ادارے یا ٹی وی چینل کی جانب سے ان کے تخلیقی کام کو بغیر اجازت نشر کرنا کاپی رائٹ کی خلاف ورزی ہے، جس پر قانونی کارروائی کی جا سکتی ہے۔
