تہران: ایرانی حکومت نے سپریم لیڈر آیت اللہ علی خامنہ ای کی تدفین اور تعزیتی تقریبات کے سلسلے میں دارالحکومت تہران میں منگل 6 جولائی کو عام تعطیل کا اعلان کر دیا ہے۔
حکومتی ترجمان فاطمہ مہاجرانی نے بتایا کہ تعطیل کا مقصد مختلف شہروں سے تعزیتی تقریبات میں شرکت کرنے والے سوگواروں کی آمد و رفت کو آسان بنانا اور انتظامی امور کو بہتر انداز میں انجام دینا ہے۔
انہوں نے کہا کہ جمعرات کو پورے ایران میں یومِ سوگ منایا جائے گا، جبکہ 4 سے 8 جولائی تک تہران، قم اور مشہد میں مختلف مذہبی اور تعزیتی تقریبات منعقد کی جائیں گی، جن میں بڑی تعداد میں عوام، مذہبی رہنما اور سماجی شخصیات شرکت کریں گی۔
تدفین 8 جولائی کو مشہد میں
ایرانی حکومت کے مطابق سپریم لیڈر آیت اللہ علی خامنہ ای کی تدفین 8 جولائی کو مشہد میں کی جائے گی، جہاں ملک بھر سے لاکھوں سوگواروں کی شرکت متوقع ہے۔
فاطمہ مہاجرانی نے مزید بتایا کہ ایران کے علاوہ عراق کے مختلف مقدس شہروں میں بھی تعزیتی اجتماعات منعقد ہوں گے، جن میں بغداد، کاظمین، کربلا اور نجف شامل ہیں۔ ان تقریبات میں مذہبی و سماجی شخصیات کے ساتھ بڑی تعداد میں عوام بھی شرکت کریں گے۔
حکومت کا کہنا ہے کہ تعزیتی پروگراموں کے دوران سکیورٹی، ٹریفک اور عوامی سہولتوں کے لیے خصوصی انتظامات کیے جا رہے ہیں تاکہ لاکھوں شرکاء کی آمدورفت کو محفوظ اور منظم بنایا جا سکے۔
