چین، امریکہ اور متحدہ عرب امارات کی پولیس نے دبئی میں ایک بڑی مشترکہ کارروائی کے دوران ٹیلی کام اور آن لائن فراڈ میں ملوث 276 مشتبہ افراد کو گرفتار کر لیا ہے۔
چینی سرکاری نشریاتی ادارے سی سی ٹی وی کے مطابق یہ بین الاقوامی سطح پر اپنی نوعیت کا پہلا مشترکہ آپریشن تھا، جس کے دوران دھوکہ دہی کے 9 بڑے نیٹ ورکس اور اڈوں کو بھی ختم کر دیا گیا۔
رپورٹ میں کہا گیا ہے کہ گرفتار ملزمان پر الزام ہے کہ وہ متاثرین کو غیر موجود کرپٹو کرنسی سرمایہ کاری اور دیگر جعلی آن لائن اسکیموں کے ذریعے دھوکہ دیتے تھے۔
چینی وزارتِ پبلک سیکیورٹی کے مطابق اس کارروائی کو تینوں ممالک کے درمیان سائبر کرائم کے خلاف تعاون میں ایک اہم پیش رفت قرار دیا جا رہا ہے، اور آئندہ ایسے مشترکہ آپریشنز کو مزید وسعت دی جائے گی۔
چینی حکام نے کہا ہے کہ حالیہ برسوں میں بین الاقوامی سائبر فراڈ نیٹ ورکس کے خلاف کارروائیوں میں اضافہ ہوا ہے اور مختلف ممالک کے ساتھ مل کر ایسے گروہوں کے خاتمے پر کام جاری ہے۔
رپورٹ کے مطابق یہ گروہ جدید ٹیلی کام اور ڈیجیٹل پلیٹ فارمز استعمال کرتے ہوئے لوگوں کو سرمایہ کاری کے جھانسے میں پھنسا کر مالی نقصان پہنچاتے تھے۔
حکام کا کہنا ہے کہ اس کارروائی سے نہ صرف بڑے فراڈ نیٹ ورک کو ختم کیا گیا ہے بلکہ بین الاقوامی سطح پر سائبر کرائم کے خلاف تعاون کو بھی نئی جہت ملی ہے۔
