وزیراعظم محمد شہباز شریف کے وژن اور ہدایات جبکہ وفاقی وزیر ریلوے محمد حنیف عباسی کی مسلسل کوششوں کے نتیجے میں پاکستان ریلوے پولیس کے برسوں پرانے مطالبے کو منظور کرتے ہوئے سروس اسٹرکچر میں اہم اصلاحات اور پے اسکیل اپ گریڈیشن کی منظوری دے دی گئی۔
سرکاری اعلامیے کے مطابق ادارہ جاتی اصلاحات کے تسلسل میں پاکستان ریلوے پولیس کے کانسٹیبل، ہیڈ کانسٹیبل اور اسسٹنٹ سب انسپکٹر (اے ایس آئی) کے پے اسکیلز کو دیگر قانون نافذ کرنے والے اداروں کے مساوی کر دیا گیا ہے۔
منظور شدہ فیصلے کے تحت:
- کانسٹیبل کا پے اسکیل بی پی ایس 5 سے بڑھا کر بی پی ایس 7 کر دیا گیا۔
- ہیڈ کانسٹیبل کا پے اسکیل بی پی ایس 7 سے بڑھا کر بی پی ایس 9 کر دیا گیا۔
- اے ایس آئی کا پے اسکیل بی پی ایس 9 سے بڑھا کر بی پی ایس 11 کر دیا گیا۔
حکام کا کہنا ہے کہ اس فیصلے سے پاکستان ریلوے پولیس کے افسران اور اہلکاروں کے مورال، پیشہ ورانہ صلاحیت اور کارکردگی میں مزید بہتری آئے گی، جبکہ فورس کو دیگر قانون نافذ کرنے والے اداروں کے مساوی مراعات فراہم کرنے میں بھی مدد ملے گی۔
ریلوے پولیس نے اس تاریخی پیش رفت پر وزیراعظم شہباز شریف اور وفاقی وزیر ریلوے محمد حنیف عباسی کا شکریہ ادا کرتے ہوئے کہا کہ یہ اقدام فورس کی دیرینہ خواہش کی تکمیل ہے اور اہلکاروں کے اعتماد میں اضافے کا باعث بنے گا۔
اعلامیے میں بتایا گیا کہ وفاقی وزیر ریلوے محمد حنیف عباسی کی ہدایت پر اس سے قبل بھی پاکستان ریلوے پولیس میں مکمل میرٹ پر بھرتیوں کا عمل مکمل کیا گیا، جس سے فورس کی پیشہ ورانہ استعداد اور کارکردگی میں نمایاں بہتری آئی۔
پاکستان ریلوے پولیس اس وقت ملک بھر میں ریلوے مسافروں کے جان و مال کے تحفظ، ریلوے تنصیبات کی سیکیورٹی اور امن و امان برقرار رکھنے کے لیے اہم ذمہ داریاں انجام دے رہی ہے۔
آئی جی پاکستان ریلوے پولیس نے اس فیصلے کا خیرمقدم کرتے ہوئے کہا کہ پے اسکیل اپ گریڈیشن سے فورس کے افسران اور جوانوں کا مورال مزید بلند ہوگا اور وہ مزید جذبے کے ساتھ اپنی ذمہ داریاں انجام دے سکیں گے۔
