وزیراعظم شہباز شریف سعودی ولی عہد اور وزیرِ اعظم شہزادہ محمد بن سلمان بن عبدالعزیز آل سعود کی دعوت پر دو روزہ سرکاری دورے پر جدہ پہنچ گئے، جہاں سعودی حکام اور پاکستانی سفارتی عملے نے ان کا پرتپاک استقبال کیا۔
وزیراعظم کے جدہ پہنچنے پر مکہ مکرمہ کے نائب گورنر شہزادہ سعود بن مشال بن عبدالعزیز، سعودی وزیرِ ماحولیات، پانی و زراعت انجینیئر عبدالرحمن بن عبدالمحسن الفضلی، سعودی عرب میں پاکستان کے سفیر احمد فاروق اور دیگر اعلیٰ حکام نے ان کا خیرمقدم کیا۔
دورۂ سعودی عرب کے دوران وزیراعظم شہباز شریف کی سعودی ولی عہد شہزادہ محمد بن سلمان سے اہم ملاقات ہوگی، جس میں پاکستان اور سعودی عرب کے درمیان دیرینہ برادرانہ تعلقات، اقتصادی و سرمایہ کاری تعاون، باہمی شراکت داری کے فروغ اور خطے کی تازہ صورتحال پر تفصیلی تبادلہ خیال کیا جائے گا۔
وزیراعظم اپنے دورے کے دوران عمرہ کی سعادت بھی حاصل کریں گے جبکہ مدینہ منورہ میں روضۂ رسول ﷺ پر حاضری دے کر سلام پیش کریں گے اور پاکستان کی سلامتی، ترقی، خوشحالی اور امتِ مسلمہ کے اتحاد و استحکام کے لیے خصوصی دعائیں کریں گے۔
وزیراعظم کے ہمراہ اعلیٰ سطح کا وفد بھی سعودی عرب پہنچا ہے، جس میں نائب وزیراعظم و وزیر خارجہ سینیٹر محمد اسحاق ڈار، آرمی چیف و چیف آف ڈیفنس فورسز فیلڈ مارشل سید عاصم منیر، وفاقی وزیر دفاع خواجہ محمد آصف، وفاقی وزیر اطلاعات عطاء اللہ تارڑ اور وزیراعظم کے معاون خصوصی طارق فاطمی شامل ہیں۔
یہ دورہ پاکستان اور سعودی عرب کے درمیان اسٹریٹجک شراکت داری کو مزید مضبوط بنانے، دوطرفہ تعاون میں وسعت لانے اور خطے میں امن و استحکام کے لیے سفارتی رابطوں کو فروغ دینے کے تناظر میں اہم قرار دیا جا رہا ہے۔
