فرانس میں پاکستان کی سفیر ممتاز زہرا بلوچ نے پیرس میں واقع تاریخی یادگار آرک ڈی ٹریمف کے نیچے گمنام سپاہی کی قبر پر منعقد ہونے والی سالانہ "راویواج ڈی لا فلیم” (شمع دوبارہ روشن کرنے کی تقریب) میں بطور مہمانِ خصوصی شرکت کی۔
پاکستانی سفارت خانے کی جانب سے جاری بیان کے مطابق آرک ڈی ٹریمف پہنچنے پر سفیر ممتاز زہرا بلوچ کا رائل برٹش لیجن (پیرس برانچ) کے نمائندوں نے پرتپاک استقبال کیا۔
تقریب کے دوران پاکستانی سفیر نے گمنام سپاہی کی قبر پر پھولوں کی چادر چڑھائی اور پہلی اور دوسری عالمی جنگ کے دوران جانوں کا نذرانہ پیش کرنے والے برطانوی اور دولتِ مشترکہ کے فوجیوں کو خراجِ عقیدت پیش کیا۔
اس موقع پر فرانسیسی فوج کی جانب سے اعزازی سلامی پیش کی گئی، جبکہ گارڈ آف آنر اور فوجی بینڈ نے پاکستان اور فرانس کے قومی ترانے بھی بجائے۔ تقریب میں فرانسیسی فوج اور سول انتظامیہ کے اعلیٰ حکام، رائل برٹش لیجن کے نمائندے، مختلف ممالک کے سفارت کار، برطانیہ اور دولتِ مشترکہ کے حاضر سروس اور ریٹائرڈ فوجی افسران بھی شریک ہوئے۔
مہمانوں کی یادگاری کتاب میں اپنے تاثرات قلم بند کرتے ہوئے سفیر ممتاز زہرا بلوچ نے امن، آزادی اور انسانیت کے بہتر مستقبل کے لیے جانوں کا نذرانہ پیش کرنے والے تمام شہداء کو زبردست خراجِ تحسین پیش کیا۔
واضح رہے کہ 1924ء سے ہر سال 4 اگست کو رائل برٹش لیجن (پیرس برانچ) کی جانب سے آرک ڈی ٹریمف میں شمع دوبارہ روشن کرنے کی یہ تاریخی تقریب منعقد کی جاتی ہے، جس میں پہلی اور دوسری عالمی جنگ کے دوران شہید ہونے والے برطانوی اور دولتِ مشترکہ کے فوجیوں کی قربانیوں کو یاد کیا جاتا ہے۔
