یمن میں حوثی عسکریت پسندوں نے مارب اور حضرالموت میں یمنی ایمرجنسی فورسز کے ٹھکانوں پر بڑے پیمانے پر میزائل اور ڈرون حملے کیے، جن کے نتیجے میں کم از کم 45 افراد ہلاک ہو گئے۔ ابتدائی اطلاعات کے مطابق ہلاک ہونے والوں کی اکثریت کا تعلق سرکاری سیکیورٹی فورسز سے ہے۔
سیکیورٹی ذرائع کے مطابق حوثی جنگجوؤں نے مارب گورنریٹ کے قریب قائم ایمرجنسی فورسز کی ایک چھاؤنی کو تین مختلف سمتوں سے نشانہ بنایا۔ حملوں میں درمیانے فاصلے تک مار کرنے والے میزائل استعمال کیے گئے، جبکہ کارروائی کے دوران خودکش ڈرونز سمیت 20 سے زائد پروجیکٹائل بھی داغے گئے۔
حملوں کے نتیجے میں فوجی تنصیبات کو شدید نقصان پہنچا، جبکہ متعدد اہلکار زخمی بھی ہوئے۔ متاثرہ علاقوں میں امدادی کارروائیاں جاری ہیں اور زخمیوں کو قریبی اسپتالوں میں منتقل کیا جا رہا ہے۔
یمن میں حوثی گروپ اور حکومتی فورسز کے درمیان جاری تنازع کے تناظر میں اس حملے کو حالیہ عرصے کی بڑی عسکری کارروائیوں میں شمار کیا جا رہا ہے۔ مبصرین کے مطابق تازہ حملوں سے ملک کی سیکیورٹی صورتحال مزید کشیدہ ہونے کا خدشہ پیدا ہو گیا ہے۔
