مظفرآباد: آزاد جموں و کشمیر قانون ساز اسمبلی کے انتخابات کے دوسرے مرحلے میں مظفرآباد ڈویژن کی 8 اور مہاجرین کی 12 نشستوں کے غیر حتمی اور غیر سرکاری نتائج موصول ہونا شروع ہوگئے ہیں، جن کے مطابق اب تک پاکستان مسلم لیگ (ن) 12 جبکہ پاکستان پیپلز پارٹی 4 نشستوں پر کامیابی حاصل کر چکی ہے۔
مظفرآباد ڈویژن کی 8 نشستوں پر پولنگ صبح 8 بجے شروع ہوئی جو مقررہ وقت شام 5 بجے تک جاری رہی، تاہم بعض علاقوں میں ووٹرز کی موجودگی کے باعث پولنگ کے وقت میں ایک گھنٹے کی توسیع کی گئی۔ دوسری جانب پاکستان میں مقیم کشمیری مہاجرین کی 12 مخصوص نشستوں پر بھی ووٹنگ کا عمل مکمل ہوا۔
غیر سرکاری نتائج کے مطابق ایل اے 25 نیلم ویلی 1 سے مسلم لیگ (ن) کے شاہ غلام قادر کامیاب قرار پائے، جبکہ ایل اے 29 مظفرآباد 3 سے پاکستان پیپلز پارٹی کے سردار مختار خان نے کامیابی حاصل کی۔ ایل اے 30 مظفرآباد 4 میں مسلم لیگ (ن) کے مصطفیٰ بشیر عباسی اور ایل اے 33 مظفرآباد 7 میں پیپلز پارٹی کے دیوان علی خان قمر چغتائی کامیاب رہے۔
دیگر حلقوں ایل اے 26، ایل اے 28، ایل اے 31 اور ایل اے 32 میں ووٹوں کی گنتی جاری ہے، جہاں ابتدائی نتائج کے مطابق مختلف جماعتوں کے امیدواروں کے درمیان سخت مقابلہ دیکھنے میں آ رہا ہے۔
مہاجرین کی نشستوں پر بھی مسلم لیگ (ن) نے نمایاں برتری حاصل کی۔ ایل اے 35، 36، 37، 38، 39، 41، 42، 43 اور 44 میں ن لیگ کے امیدوار کامیاب قرار پائے، جبکہ ایل اے 40 کشمیر ویلی 1 اور ایل اے 45 کشمیر ویلی 6 پر پاکستان پیپلز پارٹی نے کامیابی حاصل کی۔ ایل اے 34 جموں 1 مسلم لیگ (ن) کے ناصر حسین ڈار جیت گئے۔
الیکشن حکام کے مطابق خراب موسمی حالات کے باعث ایل اے 27 مظفرآباد میں تمام پولنگ اسٹیشنز پر پولنگ ملتوی کر دی گئی، جس کی نئی تاریخ بعد میں جاری کی جائے گی۔
حتمی سرکاری نتائج الیکشن کمیشن کی جانب سے تمام پولنگ اسٹیشنز کے نتائج موصول ہونے کے بعد جاری کیے جائیں گے۔
