اسلام آباد: پاکستان میں ایران کے سفیر رضا امیری مقدم نے کہا ہے کہ ایران اور پاکستان کے درمیان برادرانہ تعلقات ایران کی دماوند اور پاکستان کی کے ٹو چوٹیوں کی طرح بلند اور مضبوط ہیں، اور دونوں ممالک کی دوستی کو کوئی بیرونی عنصر کمزور نہیں کر سکتا۔
سوشل میڈیا پر جاری اپنے بیان میں ایرانی سفیر نے کہا کہ ایران اور پاکستان کے تاریخی تعلقات مختلف آزمائشوں اور چیلنجز کے باوجود ہمیشہ مضبوطی سے قائم رہے ہیں۔
انہوں نے کہا کہ دونوں ممالک صدیوں پر محیط مشترکہ تاریخ، تہذیب، مذہبی اقدار اور ثقافتی روابط سے جڑے ہوئے ہیں، جبکہ گزشتہ دو برس کے دوران دوطرفہ تعلقات مضبوطی اور پائیداری کے ایک نئے مرحلے میں داخل ہوئے ہیں۔
رضا امیری مقدم نے کہا کہ موجودہ دور میں دونوں ممالک کے درمیان تعاون مزید فروغ پا رہا ہے اور اب کوئی بھی چیلنج، کوئی واقعہ یا کوئی بیرونی عنصر ایران اور پاکستان کے برادرانہ تعلقات کو متاثر نہیں کر سکتا۔
انہوں نے اس امید کا اظہار کیا کہ ایران اور پاکستان کی دوستی خطے میں اچھی ہمسائیگی، باہمی احترام اور تعاون کی ایک مثالی مثال بنے گی، جس سے نہ صرف دونوں ممالک بلکہ پورا خطہ بھی مستفید ہوگا۔
