اسلام آباد: فیلڈ مارشل سید عاصم منیر نے کہا ہے کہ پاکستان کی مسلح افواج دشمن انٹیلی جنس ایجنسیوں کی ملک کو غیر مستحکم کرنے کی کوششوں سے مکمل طور پر آگاہ ہیں، جبکہ سرحد پار سے ہونے والی دہشت گردی کو ریاست پوری قوت سے کچل دے گی۔
پاک فوج کے شعبۂ تعلقات عامہ (آئی ایس پی آر) کے مطابق فیلڈ مارشل سید عاصم منیر نے نیشنل ڈیفنس یونیورسٹی (این ڈی یو) کا دورہ کیا، جہاں صدر این ڈی یو نے ان کا استقبال کیا۔
دورے کے دوران فیلڈ مارشل نے نیشنل سکیورٹی اینڈ وار کورس کے گریجویٹنگ افسران سے خطاب کرتے ہوئے کہا کہ جنگ کی نوعیت تیزی سے تبدیل ہو رہی ہے اور پاکستان کی مسلح افواج بھی اپنی حکمت عملی، صلاحیتوں اور تیاریوں کو جدید تقاضوں کے مطابق ڈھال رہی ہیں۔
انہوں نے کہا کہ سٹریٹجک وضاحت اور ادارہ جاتی پیشہ ورانہ مہارت ہی پیچیدہ قومی سلامتی کے چیلنجز سے نمٹنے کی بنیاد ہیں، جبکہ نیشنل ڈیفنس یونیورسٹی جیسے ادارے مستقبل کی عسکری اور سول قیادت کو ہائبرڈ، روایتی اور غیر روایتی خطرات کا مقابلہ کرنے کے لیے تیار کر رہے ہیں۔
فیلڈ مارشل سید عاصم منیر نے کہا کہ دشمن انٹیلی جنس ایجنسیوں کے زیر سرپرستی کام کرنے والے پراکسی نیٹ ورکس پاکستان کے امن، استحکام اور معاشی ترقی کو نقصان پہنچانے میں کامیاب نہیں ہوں گے۔
انہوں نے واضح کیا کہ سرحد پار سے ہونے والی دہشت گردی کے خلاف ریاست پوری قوت سے کارروائی کرے گی اور قوم کی حمایت سے دہشت گردوں کے ٹھکانے اور ان کے سہولت کاروں کا مکمل خاتمہ کیا جائے گا۔
اپنے خطاب میں فیلڈ مارشل نے کہا کہ جنگیں میڈیا کے شور یا سیاسی نعروں سے نہیں بلکہ ایمان، اتحاد، نظم و ضبط اور پیشہ ورانہ مہارت سے جیتی جاتی ہیں۔
انہوں نے پاکستان کی مسلح افواج کی پیشہ ورانہ صلاحیت، بلند حوصلے اور آپریشنل تیاری پر مکمل اعتماد کا اظہار کرتے ہوئے گریجویٹنگ افسران کو دیانت، بے لوث خدمت اور وطن سے غیر متزلزل وابستگی کو اپنی عملی زندگی کا شعار بنانے کی تلقین کی۔
