اسلام آباد: متحدہ عرب امارات (یو اے ای) نے کئی ماہ کی غیر یقینی صورتحال کے بعد پاکستانی شہریوں کے لیے وزٹ ویزا کے اجرا میں نرمی کرتے ہوئے رجسٹرڈ ٹریول ایجنٹس کے ذریعے جمع کرائی جانے والی درخواستوں پر دوبارہ کارروائی شروع کر دی ہے۔ اس پیش رفت کی تصدیق ٹریول انڈسٹری کے نمائندوں اور پاکستان میں متحدہ عرب امارات کے سفارت خانے کے ایک اہلکار نے کی ہے۔
متحدہ عرب امارات تقریباً 18 لاکھ پاکستانیوں کا دوسرا گھر ہے اور پاکستان کے لیے ترسیلاتِ زر کے سب سے بڑے ذرائع میں شمار ہوتا ہے۔ حالیہ مہینوں میں ویزا درخواستوں میں تاخیر اور سخت جانچ پڑتال کے باعث پاکستانی شہریوں کو مشکلات کا سامنا تھا، اگرچہ اسلام آباد اور ابوظہبی دونوں مسلسل یہ مؤقف اختیار کرتے رہے کہ پاکستانیوں پر کسی قسم کی سرکاری ویزا پابندی عائد نہیں۔
ٹریول ایجنٹس کے مطابق سب سے بڑی سہولت خاندانوں کے ساتھ سفر کرنے والے درخواست دہندگان کو ملی ہے، جن کی درخواستوں پر پہلے طویل انتظار کرنا پڑتا تھا، لیکن اب ان پر نسبتاً تیزی سے کارروائی کی جا رہی ہے۔
غیرملکی میڈیا کے مطابق ٹریول ایجنٹس ایسوسی ایشن آف پاکستان (TAAP) کے سابق چیئرمین محمد ندیم شریف نے کہا کہ پاکستان میں متحدہ عرب امارات کے سفارت خانے نے خاندانوں کے ساتھ سفر کرنے والے پاکستانی سیاحوں کو دوبارہ وزٹ ویزے جاری کرنا شروع کر دیے ہیں، جو ایک خوش آئند پیش رفت ہے۔
ان کے مطابق ایسے درخواست دہندگان جن کے اہلِ خانہ پہلے ہی متحدہ عرب امارات میں مقیم ہیں یا جو خاندان کے ہمراہ سفر کر رہے ہیں، انہیں اب بروقت جواب موصول ہو رہا ہے۔ انہوں نے مزید کہا کہ سیاحتی سرگرمیوں کے فروغ کی مہمیں بھی دوبارہ شروع ہو گئی ہیں اور حالیہ علاقائی کشیدگی کے بعد سفری سرگرمیاں بتدریج معمول پر آ رہی ہیں۔
امیگریشن حکام کے مطابق پاکستان سے دبئی جانے والے روزانہ مسافروں کی تعداد بھی نمایاں طور پر بڑھی ہے۔ ایک سینئر امیگریشن اہلکار نے بتایا کہ رواں موسم گرما کے آغاز میں یومیہ تقریباً 170 مسافر دبئی جا رہے تھے، جبکہ جولائی کے آخری ہفتے تک یہ تعداد بڑھ کر 400 کے قریب پہنچ گئی۔ تاہم یہ تعداد اب بھی دو سال قبل کے تقریباً 1,000 یومیہ مسافروں سے کم ہے۔
TAAP کے عہدیدار محمد حنیف رنچ نے بھی تصدیق کی کہ گزشتہ ہفتے سے صورتحال میں بہتری آئی ہے اور خاندانوں کے ساتھ سفر کرنے والے پاکستانیوں کی ویزا درخواستوں کی منظوری کی شرح میں واضح اضافہ ہوا ہے۔ ان کے مطابق اس وقت متحدہ عرب امارات جانے والے پاکستانی زائرین میں تقریباً 10 فیصد فیملی ٹریولرز شامل ہیں۔
پاکستان میں متحدہ عرب امارات کے سفارت خانے کے ایک اہلکار نے بھی تصدیق کی کہ رجسٹرڈ ٹریول ایجنٹس کے ذریعے عام پاسپورٹ رکھنے والے پاکستانی شہریوں کے وزٹ ویزے جاری کیے جا رہے ہیں۔
اہلکار نے بتایا کہ سیکیورٹی اور حفاظتی وجوہات کی بنا پر ماضی میں کارروائی میں تاخیر ہوئی تھی، تاہم اب مکمل دستاویزات رکھنے والے درخواست دہندگان بغیر کسی بڑی رکاوٹ کے درخواست جمع کرا سکتے ہیں۔
واضح رہے کہ گزشتہ سال اپریل میں پاکستان اور متحدہ عرب امارات نے وزیر داخلہ محسن نقوی اور ان کے اماراتی ہم منصب کی ملاقات کے دوران ویزا اجرا میں سہولت کے لیے ضروری اقدامات پر اتفاق کیا تھا۔ بعد ازاں پاکستان کی وزارت خارجہ نے پارلیمنٹ کو بتایا تھا کہ بعض درخواست دہندگان کی جانب سے جعلی تعلیمی اسناد، ملازمت کے معاہدے اور دیگر دستاویزات جمع کرانے، غیر مجاز سیاسی سرگرمیوں، مجرمانہ مقدمات اور سوشل میڈیا کے غلط استعمال جیسے عوامل کے باعث ویزا جانچ کا عمل مزید سخت کیا گیا تھا۔
