ریاض: سعودی عرب کی وزارتِ داخلہ نے ویزے کی مدت ختم ہونے کے باوجود مملکت میں غیر قانونی طور پر قیام کرنے والے غیر ملکیوں کے خلاف سخت قانونی کارروائی کا انتباہ جاری کرتے ہوئے کہا ہے کہ امیگریشن قوانین کی خلاف ورزی کسی صورت برداشت نہیں کی جائے گی۔
وزارتِ داخلہ کی جانب سے پیر کو جاری بیان کے مطابق، جو غیر ملکی اپنے ویزے کی معیاد ختم ہونے کے بعد بھی مقررہ وقت پر سعودی عرب سے روانہ نہیں ہوگا، اس کے خلاف مروجہ قوانین کے تحت سخت قانونی کارروائی عمل میں لائی جائے گی۔
بیان میں کہا گیا ہے کہ خلاف ورزی کرنے والے افراد کو 50 ہزار سعودی ریال تک جرمانہ، 6 ماہ تک قید اور سزا مکمل ہونے کے بعد ملک بدری (ڈی پورٹیشن) کا سامنا کرنا پڑ سکتا ہے۔
سعودی وزارتِ داخلہ نے واضح کیا کہ مملکت میں اقامہ، لیبر اور سرحدی قوانین پر سختی سے عمل درآمد جاری ہے اور ان قوانین کی خلاف ورزی کے خلاف زیرو ٹالرنس پالیسی اختیار کی گئی ہے۔
وزارت نے تمام غیر ملکی شہریوں کو ہدایت کی ہے کہ وہ اپنے ویزے کی مدت پر نظر رکھیں، مقررہ وقت پر سعودی عرب سے روانہ ہوں اور تمام قانونی تقاضوں کی مکمل پابندی کریں تاکہ جرمانے، قید اور ملک بدری جیسی سزاؤں سے بچا جا سکے۔
بیان کے مطابق اگر کسی شخص کو اقامہ، ویزا یا سرحدی قوانین کی خلاف ورزی سے متعلق معلومات ہوں تو مکہ مکرمہ، مدینہ منورہ، ریاض اور مشرقی صوبے میں 911 جبکہ مملکت کے دیگر تمام علاقوں میں 999 پر اطلاع دی جا سکتی ہے۔
