جوہانسبرگ: جنوبی افریقا کے علاقے سیبینزا (Sebenza) میں نامعلوم مسلح افراد کی فائرنگ کے نتیجے میں چار پاکستانی شہری جاں بحق ہو گئے۔ پولیس نے واقعے کو بظاہر ٹارگٹ کلنگ قرار دیتے ہوئے تحقیقات کا آغاز کر دیا ہے۔
پولیس کے مطابق یہ واقعہ ہفتے کی شام زور فونٹین روڈ پر اس وقت پیش آیا جب چاروں پاکستانی شہری اپنی گاڑی میں سوار ہو کر گھر واپس جا رہے تھے۔ متاثرین ٹیمبیسا میں چھوٹی دکانوں کے مالک تھے۔
ابتدائی تحقیقات کے مطابق جیسے ہی متاثرین کی گاڑی ٹریفک سگنل پر رکی، ایک سفید رنگ کی سیڈان کار ان کے قریب آ کر رکی۔ گاڑی سے مسلح افراد باہر نکلے اور دونوں جانب سے اندھا دھند فائرنگ کر دی، جس کے نتیجے میں چاروں پاکستانی شہری موقع پر ہی جاں بحق ہو گئے۔
امدادی اہلکاروں نے موقع پر پہنچ کر چاروں افراد کی ہلاکت کی تصدیق کی، جبکہ پولیس نے جائے وقوع سے 9 ایم ایم پستول کے متعدد خول قبضے میں لے لیے ہیں۔
حکام کا کہنا ہے کہ واقعہ بظاہر ٹارگٹ کلنگ معلوم ہوتا ہے، تاہم حملے کا مقصد ابھی واضح نہیں ہو سکا۔ تاحال کسی مشتبہ شخص کی گرفتاری عمل میں نہیں آئی، جبکہ پولیس مختلف پہلوؤں سے واقعے کی تحقیقات جاری رکھے ہوئے ہے۔
