تل ابیب: اسرائیلی وزیراعظم بنجمن نیتن یاہو نے مبینہ طور پر اپنی کابینہ کو آگاہ کیا ہے کہ امریکا چاہتا ہے کہ اسرائیل غزہ، لبنان اور شام میں تعینات اپنی فوجوں کا انخلاء کرے، تاہم انہوں نے واضح کیا ہے کہ وہ اس مطالبے سے اتفاق نہیں کریں گے۔
اسرائیلی ٹی وی چینل 13 کی رپورٹ کے مطابق، معاملے سے آگاہ سیکیورٹی ذرائع کا کہنا ہے کہ واشنگٹن اسرائیلی دفاعی افواج (IDF) کے تینوں محاذوں سے مرحلہ وار انخلاء کا خواہاں ہے، تاہم یہ واضح نہیں کیا گیا کہ انخلاء جزوی ہوگا یا مکمل۔
رپورٹ میں کہا گیا ہے کہ نیتن یاہو نے کابینہ کے وزراء کو بتایا کہ وہ امریکی مطالبے کے سامنے جھکنے کے بجائے اپنے مؤقف پر قائم رہنے کا ارادہ رکھتے ہیں۔
چینل 13 کے مطابق، وزیراعظم نے کابینہ سے گفتگو میں کہا، "میں انہیں نہیں کہوں گا،” اور اس بات کا اعادہ کیا کہ وہ اسرائیلی افواج کے انخلاء کے مطالبے کی مزاحمت کریں گے۔
اس حوالے سے امریکی حکومت کی جانب سے فوری طور پر کوئی باضابطہ بیان سامنے نہیں آیا، جبکہ رپورٹ میں کیے گئے دعوؤں کی آزاد ذرائع سے بھی تصدیق نہیں ہو سکی۔
