مستونگ: بلوچستان کے ضلع مستونگ کے علاقے ولی خان میں نامعلوم مسلح افراد نے سیشن جج کی گاڑی پر فائرنگ کر دی، جس کے نتیجے میں سیشن جج عبدالحکیم کاکڑ اور ان کے گن مین جاں بحق جبکہ ایڈیشنل سیشن جج طارق لاشاری سمیت دو افراد شدید زخمی ہو گئے۔
ڈسٹرکٹ پولیس آفیسر (ڈی پی او) اللہ بخش بلوچ کے مطابق سیشن جج عبدالحکیم کاکڑ اور ایڈیشنل سیشن جج طارق لاشاری کوئٹہ سے سیشن کورٹ مستونگ جا رہے تھے کہ راستے میں نامعلوم حملہ آوروں نے ان کی گاڑی کو نشانہ بنایا۔
پولیس کے مطابق حملے کے نتیجے میں سیشن جج عبدالحکیم کاکڑ اور ان کے سکیورٹی گارڈ موقع پر جاں بحق ہو گئے، جبکہ ایڈیشنل سیشن جج طارق لاشاری سمیت دو افراد شدید زخمی ہوئے، جنہیں فوری طور پر قریبی اسپتال منتقل کر دیا گیا۔
واقعے کے بعد قانون نافذ کرنے والے اداروں نے علاقے کی ناکہ بندی کر کے حملہ آوروں کی تلاش کے لیے سرچ آپریشن شروع کر دیا ہے، جبکہ فائرنگ کے محرکات اور حملہ آوروں کی شناخت کے لیے تحقیقات جاری ہیں۔
پولیس حکام کا کہنا ہے کہ جاں بحق افراد کی لاشیں اور زخمیوں کو اسپتال منتقل کر دیا گیا ہے، جبکہ مزید شواہد اکٹھے کیے جا رہے ہیں۔ حکام نے واقعے کی مکمل تحقیقات کا آغاز کر دیا ہے۔
