پشاور: محکمہ داخلہ خیبرپختونخوا نے دہشت گردی کے مقدمات میں مطلوب 15 انتہائی مطلوب دہشت گردوں کی گرفتاری یا ان کے بارے میں مصدقہ معلومات فراہم کرنے والوں کے لیے کروڑوں روپے مالیت کے انعامات کا اعلان کر دیا ہے۔
محکمہ داخلہ کی جانب سے جاری اعلامیے کے مطابق مطلوب دہشت گرد خورشید کے سر کی قیمت سب سے زیادہ ایک کروڑ 20 لاکھ روپے مقرر کی گئی ہے، جبکہ شیر آمین عرف کاکا کی گرفتاری یا قابلِ اعتماد اطلاع دینے والے کے لیے ایک کروڑ روپے انعام رکھا گیا ہے۔
اعلامیے کے مطابق قاری احسان اور شیر عالم کی گرفتاری یا معلومات فراہم کرنے پر 60، 60 لاکھ روپے انعام دیا جائے گا۔
اسی طرح سپین شاہ، اعجاز اور دیگر مطلوب دہشت گردوں کی گرفتاری یا ان سے متعلق معلومات فراہم کرنے والوں کے لیے 50، 50 لاکھ روپے انعام مقرر کیا گیا ہے۔
محکمہ داخلہ نے مزید بتایا کہ کفایت، حضرت حسین اور شریف اللہ کی گرفتاری یا اطلاع دینے پر 40، 40 لاکھ روپے انعام دیا جائے گا۔
دوسری جانب محکمہ انسداد دہشت گردی (سی ٹی ڈی) نے عوام سے اپیل کی ہے کہ اگر کسی مطلوب دہشت گرد کے بارے میں کوئی مستند معلومات موجود ہوں تو فوری طور پر قانون نافذ کرنے والے اداروں سے رابطہ کیا جائے۔
سی ٹی ڈی کے مطابق اطلاع فراہم کرنے والے افراد کی شناخت مکمل طور پر خفیہ رکھی جائے گی، جبکہ فراہم کی جانے والی معلومات کی بنیاد پر بروقت کارروائی عمل میں لائی جائے گی۔
حکام کا کہنا ہے کہ دہشت گردی کے خلاف جاری کارروائیوں میں عوام کا تعاون انتہائی اہم ہے اور شہریوں کی جانب سے فراہم کردہ معلومات دہشت گرد عناصر کی گرفتاری میں مؤثر کردار ادا کر سکتی ہیں۔
