کہوٹہ: راولپنڈی کے علاقے کہوٹہ میں عدالت سے واپسی کے دوران قیدی وین سے 14 قیدی فرار ہونے کا واقعہ پیش آیا، تاہم پولیس نے فوری کارروائی کرتے ہوئے ان میں سے 4 قیدیوں کو دوبارہ گرفتار کر لیا، جبکہ باقی مفرور ملزمان کی تلاش کے لیے وسیع سرچ آپریشن جاری ہے۔
پولیس ذرائع کے مطابق قیدیوں کو عدالت میں پیشی کے بعد اڈیالہ جیل منتقل کیا جا رہا تھا کہ راستے میں چیکنگ کے دوران یہ واقعہ پیش آیا۔
ذرائع کا کہنا ہے کہ جیسے ہی قیدی وین کو معمول کی تلاشی کے لیے روکا گیا، ایک قیدی نے موقع سے فائدہ اٹھاتے ہوئے ڈیوٹی پر موجود پولیس اہلکاروں کی آنکھوں میں مرچوں کا سفوف پھینک دیا، جس کے نتیجے میں پیدا ہونے والی افراتفری کے دوران 14 قیدی فرار ہونے میں کامیاب ہوگئے۔
واقعے کے فوراً بعد پولیس اور دیگر قانون نافذ کرنے والے اداروں نے علاقے کو گھیرے میں لے لیا اور تعاقب کے دوران 4 فرار قیدیوں کو دوبارہ گرفتار کر لیا گیا۔
پولیس کے مطابق باقی مفرور قیدیوں کی گرفتاری کے لیے کہوٹہ اور اس کے گردونواح میں بڑے پیمانے پر سرچ آپریشن جاری ہے۔ اس سلسلے میں علاقے کے تمام داخلی اور خارجی راستوں کو سیل کر دیا گیا ہے جبکہ اضافی پولیس نفری بھی طلب کر لی گئی ہے۔
حکام کا کہنا ہے کہ فرار ہونے والے باقی قیدیوں کی گرفتاری کے لیے مختلف ٹیمیں تشکیل دے دی گئی ہیں اور آپریشن اس وقت تک جاری رہے گا جب تک تمام مفرور ملزمان کو دوبارہ گرفتار نہیں کر لیا جاتا۔
