اسلام آباد: پاکستان الیکٹرانک میڈیا ریگولیٹری اتھارٹی (پیمرا) نے جیو نیوز کی معطلی سے متعلق کیس میں حتمی فیصلہ جاری کرتے ہوئے 15 روزہ معطلی، ایک کروڑ روپے جرمانے اور متعدد سخت ہدایات کو برقرار رکھا ہے۔
پیمرا کے مطابق یہ معاملہ جیو نیوز کے پروگرام "سفر عشق” کی 10 محرم الحرام کی نشریات میں مذہبی تصویر کشی سے متعلق تھا۔ اتھارٹی نے 11 جولائی کو اپنے 191ویں اجلاس میں اس کیس کا تفصیلی جائزہ لیا۔
اعلامیے کے مطابق اجلاس میں کونسل آف کمپلینٹس لاہور کی سفارشات، کارروائی کا مکمل ریکارڈ، جیو نیوز کے تحریری اور زبانی مؤقف، پیمرا آرڈیننس 2002، متعلقہ قواعد اور الیکٹرانک میڈیا (پروگرامز اینڈ ایڈورٹائزمنٹس) کوڈ آف کنڈکٹ 2015 کی متعلقہ شقوں کو مدنظر رکھا گیا۔
پیمرا نے بتایا کہ کونسل آف کمپلینٹس لاہور نے اس معاملے پر 30 جون، 2 جولائی اور 10 جولائی 2026 کو ہونے والے اپنے 127ویں، 128ویں اور 129ویں اجلاسوں میں غور کیا۔ لائسنس ہولڈر کے نمائندوں کا مؤقف سننے، دستیاب شواہد کا جائزہ لینے اور اسلامی نظریاتی کونسل کی رائے کو مدنظر رکھنے کے بعد سفارشات اتھارٹی کو ارسال کی گئیں۔
فیصلے میں کہا گیا ہے کہ جیو نیوز اور اس کے نمائندگان کو صفائی پیش کرنے کا مکمل موقع فراہم کیا گیا، تاہم اتھارٹی نے قرار دیا کہ متعلقہ خلاف ورزی سنگین نوعیت کی تھی اور ذمہ دارانہ نشریات سے متعلق پیمرا قوانین اور لائسنس کی شرائط کے منافی ہے۔
پیمرا نے جیو نیوز کی جانب سے غفلت تسلیم کرنے، اظہارِ ندامت اور تمام میڈیا پلیٹ فارمز پر غیر مشروط معذرت کو تخفیفی عوامل قرار دیا، تاہم واضح کیا کہ یہ عوامل خلاف ورزی یا اس کے قانونی نتائج کو ختم نہیں کرتے۔
حتمی فیصلے کے مطابق 27 جون 2026 کو جاری کیا گیا جیو نیوز کا 15 روزہ لائسنس معطلی کا حکم برقرار رکھا گیا ہے اور چینل کی معطلی 11 جولائی کی رات 12 بجے تک مؤثر رہے گی۔ فیصلے میں کہا گیا ہے کہ نشریات صرف معطلی کی مدت مکمل ہونے اور ایک کروڑ روپے جرمانے کی ادائیگی کے بعد ہی بحال کی جا سکیں گی۔
پیمرا نے جیو نیوز انتظامیہ کو ہدایت کی ہے کہ ذمہ داریوں کی ادائیگی میں ناکامی کے مرتکب متعلقہ افراد کے خلاف ضابطے کے مطابق کارروائی مکمل کر کے انہیں ملازمت سے برطرف کیا جائے۔ فیصلے کے مطابق برطرف کیے جانے والے افراد مستقبل میں پیمرا کے زیر نگرانی کسی بھی لائسنس یافتہ، رجسٹرڈ یا مجاز میڈیا ادارے سے براہِ راست یا بالواسطہ وابستہ نہیں ہو سکیں گے۔
اتھارٹی نے جیو نیوز کو متنبہ کیا کہ آئندہ اسی نوعیت کی خلاف ورزی کی صورت میں اس کا لائسنس منسوخ بھی کیا جا سکتا ہے۔
پیمرا نے تمام ٹی وی چینلز اور دیگر لائسنس یافتگان کو ہدایت جاری کی ہے کہ وہ غیر جانبدار اور باصلاحیت ان ہاؤس مانیٹرنگ کمیٹی یا ایڈیٹوریل بورڈ تشکیل دیں، ان کی تفصیلات پیمرا کو فراہم کریں اور ہر پروگرام کی پیشگی ادارتی جانچ کو یقینی بنائیں۔
مزید برآں، اتھارٹی نے فیصلہ کیا ہے کہ سپریم کورٹ کے ازخود نوٹس کیس کے فیصلے پر سختی سے عمل درآمد کے لیے تمام لائسنس یافتگان کو علیحدہ ہدایت نامہ جاری کیا جائے گا۔ پیمرا نے خبردار کیا کہ مستقبل میں کسی بھی خلاف ورزی کی صورت میں قانون کے مطابق مزید سخت کارروائی عمل میں لائی جائے گی۔
