اسلام آباد: وفاقی کابینہ نے اہم فیصلہ کرتے ہوئے پاکستان ایگری کلچرل اسٹوریج اینڈ سروسز کارپوریشن لمیٹڈ (پاسکو) کو دسمبر 2026 تک مرحلہ وار ختم کرنے کی منظوری دے دی ہے۔
ذرائع کے مطابق وفاقی کابینہ کے اجلاس میں پاسکو کی تنظیم نو اور ادارے کی بندش سے متعلق سفارشات کی منظوری دی گئی، جبکہ ملازمین کے لیے خصوصی مالی پیکیج کی بھی منظوری دے دی گئی۔
ذرائع کا کہنا ہے کہ کابینہ نے پاسکو کے ملازمین کے لیے 4 ارب 18 کروڑ روپے کے مالی پیکیج کی منظوری دی ہے تاکہ ادارے کی بندش کے دوران ملازمین کے حقوق کا تحفظ یقینی بنایا جا سکے۔
اطلاعات کے مطابق پاسکو میں تقریباً 1,100 ریگولر ملازمین خدمات انجام دے رہے ہیں، جنہیں منظور شدہ پیکیج کے تحت سہولیات فراہم کی جائیں گی۔
ذرائع نے مزید بتایا کہ سیلاب سے متاثرہ گندم کے ذخائر کو بھی نیلام کرنے کا فیصلہ کیا گیا ہے تاکہ موجودہ ذخائر کو مناسب طریقے سے نمٹایا جا سکے۔
حکومتی ذرائع کے مطابق یہ فیصلہ سرکاری اداروں میں اصلاحات، مالی نظم و ضبط اور انتظامی کارکردگی بہتر بنانے کی حکومتی پالیسی کا حصہ ہے۔
