ریاض: سعودی عرب نے دنیا بھر سے آنے والے عمرہ زائرین کے لیے بڑی سہولت کا اعلان کرتے ہوئے ایک سالہ ملٹی پل انٹری عمرہ ویزا متعارف کرا دیا ہے، جس کے تحت زائرین ایک ہی ویزے پر سال بھر میں متعدد مرتبہ سعودی عرب کا سفر کر سکیں گے۔
اعلان کے مطابق نیا ویزا اجرا کی تاریخ سے 365 دن تک مؤثر ہوگا اور اس مدت کے دوران زائرین اپنی ضرورت کے مطابق کئی بار سعودی عرب میں داخل ہو سکیں گے۔
90 دن تک قیام کی اجازت
نئے ملٹی پل انٹری ویزے کے تحت عمرہ زائرین کو ایک سال کے دوران مجموعی طور پر 90 دن تک سعودی عرب میں قیام کی اجازت ہوگی، جس سے بار بار عمرہ ادا کرنے کے خواہش مند افراد کو نمایاں سہولت ملے گی۔
حج سیزن میں ویزا قابلِ استعمال نہیں ہوگا
سعودی حکام کے مطابق اس ویزے کے ذریعے حج سیزن کے دوران سعودی عرب میں داخلہ ممکن نہیں ہوگا۔ یہ ویزا صرف عمرہ، زیارت اور دیگر مجاز مقاصد کے لیے استعمال کیا جا سکے گا، جبکہ حج کے لیے بدستور علیحدہ ضوابط اور ویزا پالیسی نافذ رہے گی۔
نئے اقدام کا مقصد عمرہ زائرین کے لیے سفری سہولتوں میں اضافہ، مذہبی سیاحت کو فروغ دینا اور سعودی عرب آنے والے بین الاقوامی زائرین کو زیادہ آسان اور لچکدار ویزا سہولت فراہم کرنا ہے۔
