ریاض: سعودی عرب کی وزارتِ سیاحت نے نئی ٹورسٹ پیکیج ویزا سروس کی تفصیلات جاری کرتے ہوئے اس کے تجرباتی مرحلے کا آغاز کر دیا ہے۔ اس نئے نظام کا مقصد بین الاقوامی سیاحوں کے لیے ویزا، فضائی سفر، ہوٹل بکنگ، سفری انشورنس اور دیگر سیاحتی سہولیات کو ایک ہی مربوط ڈیجیٹل پیکیج میں فراہم کرنا ہے۔
وزارتِ سیاحت کے ترجمان نصر الانصاری نے بتایا کہ اس اقدام سے ویزا کے حصول اور سفر کی منصوبہ بندی کا عمل نہایت آسان ہو جائے گا، جبکہ سعودی عرب نئی سیاحتی منڈیوں اور مختلف ممالک سے آنے والے زائرین کو بھی اپنی جانب متوجہ کر سکے گا۔
انہوں نے کہا کہ یہ منصوبہ مملکت کی اس حکمت عملی کا تسلسل ہے جس کے تحت پہلے ہی ای ویزا، ٹرانزٹ ویزا اور آن ارائیول ویزا جیسی سہولیات متعارف کرائی جا چکی ہیں۔ نئی سروس کے ذریعے سیاح ایک منظور شدہ ٹریول اینڈ ٹورازم کمپنی کے ذریعے ویزا، فضائی ٹکٹ، رہائش، سفری انشورنس اور دیگر سہولیات ایک ہی الیکٹرانک بکنگ میں حاصل کر سکیں گے۔
وزارت کے مطابق اس نظام میں سیاحتی تقریبات، تفریحی سرگرمیوں اور ثقافتی تجربات کے ٹکٹ بھی پیکیج میں شامل کیے جا سکتے ہیں، جس سے سیاحوں کو زیادہ منظم اور سہل سفری تجربہ حاصل ہوگا۔
نصر الانصاری نے بتایا کہ اس اقدام سے نہ صرف سفری کارروائیاں آسان ہوں گی بلکہ سیاحوں کے قیام کی مدت، سیاحتی اخراجات اور مقامی معیشت میں بھی اضافہ متوقع ہے۔ انہوں نے کہا کہ یہ منصوبہ سعودی ویژن 2030 کے اہداف کے مطابق سیاحت کے شعبے کو مزید وسعت دینے اور قومی آمدنی میں اس کے کردار کو مضبوط بنانے میں مددگار ثابت ہوگا۔
وزارتِ سیاحت نے خدمات کے اعلیٰ معیار کو یقینی بنانے کے لیے منظور شدہ ٹریول کمپنیوں کے لیے متعدد ضابطے بھی مقرر کیے ہیں، جن میں 24 گھنٹے کال سینٹر، تکنیکی معاونت اور مرکزی ڈیجیٹل نظام سے مکمل ربط شامل ہے۔
ترجمان کے مطابق وزارتِ خارجہ، وزارتِ داخلہ، سعودی ٹورازم اتھارٹی اور انشورنس اتھارٹی کے تعاون سے اس منصوبے کے تجرباتی مرحلے کا جائزہ لیا جائے گا، جس کے بعد اسے مزید ممالک اور مارکیٹس تک توسیع دینے کا فیصلہ کیا جائے گا۔
انہوں نے مزید بتایا کہ سعودی عرب ویژن 2030 کے تحت مقررہ ہدف سے پہلے 100 ملین بین الاقوامی زائرین کا سنگ میل عبور کر چکا ہے، جبکہ سیاحت کے شعبے میں مصنوعی ذہانت پر مبنی Tourism AI Vision اور Tourism X پلیٹ فارم کے ذریعے سمارٹ سیاحت کو فروغ دیا جا رہا ہے۔ اس وقت پلیٹ فارم پر مصنوعی ذہانت سے چلنے والے چھ ڈیجیٹل ٹولز دستیاب ہیں، جبکہ آئندہ تین برسوں میں 20 سے زائد نئی ڈیجیٹل خدمات متعارف کرانے کی منصوبہ بندی کی جا رہی ہے۔
